Mihingte aa dingin a manpha mahmah Pasian thupha

Mihingte aa dingin a manpha mahmah! Khua hun cih thulu nuai ah singkung lopate in ei mihingte aa dingin a manphatna thu pawl khat kong hawmsawn nuam hi. Ih pu ih pa te hun lai aa ih zak khua hun leh tu aa ih neih khua hunte ki bang nawn lo hi. Bang hang hiam cih leh singkungte ki phuk in, sing le na tuamtuam te halna meikhu leh set van tuamtuam te sung aa a ki zang namgim (Meitui, Datsi leh Disel) cih te hang hi ci in mipil te in hong gen khia uh hi.

Tua ahih man in leitung aa om gam tuamtuam te-in khua hun a hoih thei nadingin singkung suan ding hong hanthawn uh hi. Singkung ih cih in mihingte aa ding in a man pha mahmah ih dik huih hong pia in guah tui leh khua hun zong hoih sak hi. Sing kung in a it huai mahmah ih lawm hoih ci leng ki khial lo ding hi. Hih khua hun a hoihsak singkung leh kim leh paam aa om “Pasian bawlsa nate it lo-in ih suksiat leh tua te in eite hong susia kik ding hi” ci-in a Lianbel Siampi Pa Pope Francis in Laudato Si cih laibu ah hong gelh khia hi.

Singkung pen a ki zatna tam mahmah in, ei mi hingte kisapna tampi hong ki cingsak hi. Khen khat te in gah leh gui hong pia in, khen khat te in pak nei in ih lung hong nuamsak hi. Khen khat te ahih leh ann huan na, inn lam na, tutna, leh kongkhak cihte ah ih mu thei hi. Tua ahih man in singkung om lo hi leh a ki nungta zo lo ding khat ahi hi. Tu in singkungte a mawk bei lohna dingin nang leh kei-in vaipuak lianpi ih nei hi.

Source and Edit: Mr. Anthony Piang