Thupha a ngah leh a hawmkhia Innkuan

Kong it Ulenau, nulepa, lawmlegual RVA  tawh akizom khem peuh taangbang nadam kim uh hiam ci-in kong muak masa hi. RVA Innkuan Thu cih thulu sungah ih ki kupdingin “Thupha a ngah leh a hawmkhia Innkuan hih Theih Nading” cih thu tawh holung kum khawm ni.

Hih thulu tawh ki zui-in Lai Siangtho sim masa ni. (Matthew 5:3-10)

3 “Kha thu lamah zawngkhal a kisate sungah vantung ki-ukna thu om ahih manin thupha ngah mi ahi uh hi.

 4 Dahin a thum a tau mite Pasian in amaute hehnem ding ahih manin thupha ngah mi ahi uh hi.

5 A lungnem mite in Pasian’ ciamsa leitang ngah ding uh ahih manin thupha ngah mi ahi uh hi.

6 Pasian’ deihteng sep ding a hanciamte Pasian in lungkimna ngahsak ding ahih manin thupha ngah mi ahi uh hi.

7 Midang a hehpih mite tungah Pasian in hehpihna pia ding ahih manin thupha ngah mi ahi uh hi.

8 Lungsim takpi tawh Pasian a zong mite in Pasian mu ding ahih manin thupha ngah mi ahi uh hi.

9 Kilem nading deihin a hanciam mite in Pasian’ tate cihna ngah ding uh ahih manin thupha ngah mi ahi uh hi.

10 Pasian’ deihna bangin a gamtat manin bawlsiatna a thuak mite vantung ki-ukna sungah a omte ahih manin thupha ngah mi ahi uh hi.

Hih lai Siangtho ih sim na tawh ki tuakin Paunak khat gen leng “Lui luangin a giamna zui/zuan, gunpi in tuipi sung zuan.” Thupha in a kiniamkhiat mite zuan in ompih hi cih ih mu thei hi. “Huaihamna lungsim le minthan nopna lungsim tawh bangmah na hih kei un. Note’ sangin midangte thupi zaw hi, ci-in ngaihsunin na kiniamkhiat un.” (Phil.2:3) Tua ahih manin Pasian maiah mite akisak theihna ding thuomlo hi. Ki niamkhiatna pen Pasian deihna ahi hi. Innkuan sung, Pawlpi sung, Khuasung, Gamsungah makaite thu ih man theihna in zong ki niamkhiatna leh Pasian thu zuihna khat ahi hi. Kiniamkhiatna tungtawn aa THUPHA Hongpai ahi hi.

Topa maipha muhna in Thupha khempeuhte bulpi a hih man in mimal kim in tua thupha ih saan theih na ding leh Pasian deihna ahi tua thuphate ih hawmkhiat dingpen mihing nuntakna sungah thupi mahmah ding hi.  Tua ahih man in thupha namkim anei ih biak Pasian in nang leh kei ama thuphate a hawmkhia dingin hongsam tawntung hi.  Tu-hun khuahun siat kawmkal ah nang leh kei-in  Ei leh ei aading, Pawlpi aading, Gam leh Minam adding thu ngen ciat ni.

Thupha a ngah leh a hawmkhia Innkuante Topan hong hi sak kimciat ta hen.

Ka Lungdam.

Mr. Anthony Piang

 

Add new comment

16 + 3 =