A Siangtho Innkuan

A siangtho innkuan a hih kei leh Innkuan Siangtho cih ciangin ki bang leh ki lawm, tawm kha ki lam dang tawh lah ki bang hi. A siangtho innkuan ih ci a, Innkuan siangtho ih ci zongin Jesu, Maria, Joseph te innkuan a ci nuam ih hi hi.
Innkuan siangtho cih ciangin Pasian a it, a mau leh amau a ki-it, a ki lem, Pasian’ deihna tawh ki tuak a, anungta khawm innkuan te ahi hi.

Mihingte khat bek a ding zo omlo hi. Ki pawl khopna ki sam hi. Tua hi a, ki pawlna a tuamtuam ki phuan hi. Tua a ki pawlte pen a ki muang, a ki thu tuak teng hi a, mihingte’ phuat tawm ahi hi.
Innkuan cih pen ki pawlna khempeuh lak ah a neu pen, a bulpi pen, a masa pen hi a, Pasian ii phuat ahi hi. Innkuan khat cih ciangin Nu leh Pa leh ta te ki pawlna ahi hi.

Ta te pen Nu leh Pa ii deih teel theih hi lo hi. Ta te’n zong Nu leh Pa leh amau unau teng a ki deih teel theih hi lo a, Pasian ii gawm teng Nupa, nuta, pata, unau, innkuan a suak ahi hi. Tua ahih manin innkuan pen leitung mihing teng lak pan a ki-it pen pen ding teng ki teen khopna ahi hi.

Innkuan pen Pasian’ mite ki khopna pawlpi neu khat hi.

Innkuan pen Pasian’ biakna biakinn neu khat hi.

Innkuan pen ki don ki kep na zato neu khat hi.

Innkuan pen ki-itna phual pi hi.

Tua ciangin innkuan sung pen vantung gam neu khat hong suak ding hi.

Inn khat ih lam ciangin a thupi pen in, khuampi nga leh a taw phah khuam bulpi a to a kip ding ki sam hi. Tua mah bangin innkuan nuam, innkuan siangtho a suah nangin a taw phah khuam bulpi, a kiim kot khuampi li leh a lai ah khuam suutpi ki sam hi.

A taw phah khuam bulpi dingin ‘a ki liing zo lo Pasian’ tungah ki phut ding hi. A kiim kot inn kiu khuam pi a khot nang in ‘ki muan na’ ih phut ding hi. Khat leh khat ki muanna a om kei leh innkuan nop na kiam thei hi. Hawhna ciahna, zin na, vakna, sum zat paai zat na, mi tawh ki kholhna ah ki muanna neih ding thu pi mahmah hi.

Inn kiu khuampi nihna in ‘ki theih siam na’ ih phut ding hi. Khat ii haksatna, khat ii tha nem na, khat ii tha hat na, khat ii duh theih deih theih, ih ki theih pih ding hi. A hat pen in a mah zah in a innkuanpih te ngaih sun leh piang thei lo hi. Ki sa lim sa mahmah om a, a ne thei vet lo om hi. Tua bang dan te ah ki theih siam na thupi mahmah hi.

Inn kiu khuampi a thum na ah, ‘Ki maisakna’ khuampi ih phut ding hi. Mihing te a mawh a khial ngei lo kua mah om lo hi. Khat a khialh khak ciangin mawh sak huan ngeei ngaai leng, a mawh kha pen in thuak zo lo sem sem ding a, a mawhlo te zong hun khat teh mawh thei ve ve hi. Mawhna nei vet lo, Pasian in ih mawhna te hong maisak a hih leh bang hangin ei innkuan ki mai sak zo lo ding ih hiam”.

Inn kiu khuampi a li na in ‘Thu kup khop na’ khuam pi ih phut ding hi. Inn kuan thu kup khopna pen manpha mah mah hi. Innkuan sung thu, a pua lam thu, Pasian thu leh thu thak tuamtuam te ki kum khawm ding hi. Baangkua sung thu khawng, mi dang tung pan ih leh zak masak ding hi lo hi. Mi pawl khat innkuan sungah kam nei muk nei bang lo-in, mi’ lak teh lah ciam nui, kam tam, gual nuam mahmah hi. A pualam sangin innkuan sung ih gual nuamsak zaw ding hi.

Inn kiim kot khuampi li ban ah a lai suut pi dingin “ki-it na” khuampi ih phut ding hi. Suut pi pen khuam dang te leh inn lam na a ki zang na dang te a pua pen, a do pen, a kip sak pen ahi hi. Tua a hih man in ‘It na suutpi ih lian sak, ih kho sak ding hi. Topa Jesu in ‘na gal te na it in’ hong cih liang kawm kal ah, ei innkuan ki-it kei leng, Jesu beel ngam ding ih hiam. Laisiangtho in, ‘a u, a nau a muh theih te a it lo mi-in a muhloh Pasian bang ci it theih ding a hi hiam. (1Jn 4: 20). A u, a nau a mudah mi-in mi that ahi hi (1Jn 3: 15) ci hi. Na inn kuanpihte na muhdahna tawh nang leh nang mi that ki suak sak kei in.
Pasian in ki-it na hi. Ki-it na sung ah a om mi-in Pasian sungah a om hi. (1Jn 4: 16). A ki-it lo innkuan sungah Pasian om thei lo hi. Vantung gam ah a ki-it lo te ading mun om lo hi.

Pasian mahmah a ki pawl Pasian, Pa, Tapa, Kha Siangtho, To thum ki gawm Pasian hi. Innkuan siangtho te sungah Joseph in Pa Pasian’ lim, Tonu Maria in Kha Siangtho Pasian’ lim, naupang Jesu in Tapa Pasian (A mah mah) lim a hih bangin innkuan sungah Pa te in Joseph lim, Nu te in Tonu’ lim, tate in naupang siangtho Jesu lim sun in, innkuan siangtho (a hih kei leh) a siangtho innkuan lam tek ni.

Sources: Sia Francis Pau