Lungnopnang a vaihawm innkuan te (Nov 28.2022)

RVA angai nulepa ulenau te, Innkuan thu cih thulupi nuai-ah “Lungnopnang avaihawm Innkuante” cih thu hong hawm sawn ning.
Lungnopnang avaihawm innkuante adingin lungnopna ngah nang amasa penpen thu khat konggen ding hi. Mihing aa ih pian aa kipanin akua mahciat in ngimna hoih khat peuhmah neih hamtang ding ahi hi.
1) Mikhempeuhin ngimna nei ding
Innkuan sungah nulepa te zong ngimna neihkul hi. Tanu tapa tezong ngimna aneih theih nadingin hilh ding ahi hi.
Ngimna neilo innkuan te pen lungnopna alunggulhlo innkuan te bekmah hi ding hi. Ngimna neilo mikhat pen nuntakna nei lo ahawmpi aa om mihing khat hi ci-in mipil te’n nagen uh hi.
Tua hileh Ngimna banghangin nei ding ihi hiam?
Mikhempeuh in ei nuntakna leh ei ii sepnop lungsimte, ngahnopna te, na khat peuhpeuh neihnopna lungsim te neih kul hi. Ih neih theih nadingin zong hanciam ding ahi hi. Ih lungsim, na khat peuhpeuh, hun le ni te I ngah theih na dingin Ngimna khat limlim neih hamtang ding ahi hi. Ngimna neihding, ahun ani naciangtan khit ciangin ahunlem khat ngak inla, thasanin hanciamin, tuate pen eimau mahin ihgel ihsep ding ahi hi.
Banghang hiam cih leh Mihing te pen khatbek aki nungta thei hilo aa, khat le khat kigawmkhawmin aki nungta ahi hi. A Innkuan in kipawlkhawm aa, semkhawm aa, nuntak khopding deihna bulpi leh ngimna bulpite ahi hi.
Siavuan Dr. David Niven in hi bangin na gen hi.
“Eite khempeuh pen khat le khat I ki zomgaitek aa, Ih kiim ipaam aa-omte khempeuhpen amau ii khensatna tungtawn aa asepna te hangin eite khempeuh ading ihphat tuamna vive hong suak khin hi” ci-in hong gen hi.
Mihingte pen khat le khat kizop kithuah nate nisim naisim ahun sim ahi hi. Ih Innkuan ah zong khat le khat akizom den te ihi hi. Khat le khat ih kizopden na hangin phattuamna tampi tak hong pia hi. A kiho den, akizom den minih pen alang nihin phattuamna aomsak den ahi hi. Semkhawm, bawlkhawm, nekhawm, dawnkhawm, zangh khawm cileng zong kici thei hi.
Khat le khat kizopna bawlin ih ki thuahna te a hangin eimau mun ciat ah Ngimna ineihna hang ahi hi. Ama ngimna leh nang ii ngimna pen kibang lozong kibanglo thei kha ding hi. Akibat nop leh zong kibang thei kha ding hi.
Akibang aa, akibanglo ahi zongin eimau ii ngimna ciat anuntak tawntung nading, eimau ii ngimna ihgualzawh nading, ei tekin sepkhop theih na a-om leh, kihuh theihna a-om leh ci-in kigawmkhawm aa aki zomzom te ihi hi.
Ataktak inci leng mihing te khat le khat kigawmkhopna pen, sepkhopna, kizopna cihte tawh kizawitawh ahih manin khat ii ngimna te pen khat in seppih in, huh in, thapia in cihte I nei ciat hi.
Ngimnate akibangin thasanin sepkhawm bawlkhopna pen Ngimna sung aa kibulphuh ahi, tua cih ding, hih cih ding cihte pen aphat tuamna khat peuhpeuh hong pianma aa ih sep ihbawl na te pen ihgim ihtawlna te zong pen alungkim huai, alungdam huai mahmah ahi hi.
Ngimna te atangtun nang, lamhoih zonna, lamhoih ngahnang ngetna, lamhoih zuihna hong thapia te tawh zongkhawm aa, amau tawh kigawmkhawm aa ih hih na zong pen khat le khat hong kimuangsak tuam in, khat le khat ih ki-itna zong hong khangsak mahmah hi. Mihing te khat le khat ki-itna hong khanciangin tua mite ii lungnopna zong hong khang mahmah hi.
Ih Innkuan baangkua sungah zong Ngimna hoih khat gelin innkuan sung aom mimal khempeuh kipawlkhawm semkhawmin hanciamkhawm leng, tua in khat le khat hong kithutuaksakin hongkilomkhat sakin ih lungsim te hong thaksuak sak in atawntungin hong lungdamsak hong lungnuam sak tawntung ding hi.
Tua ahih ciangin lungnopna na lunggulh leh Ngimna khat teitei nei hamtangin cih pen amasa penpen numbat (1) thu ahi hi.
RVA Zo pau tawh lungdamthu tangkona a za angai NulePa UleNau akuamah ciat tungah Topa’n thupha hong pia ciat ta hen.