KEI LEH KA INNKUANPIH TE’N TOPA NA SEM NUNG.

Gam tuam tuam, khua tuam tuam aom Zomi u leh nau te khempeuh, ih biak Topa Pasian min tawh nohset in hong hopih ing. Pasian hehpihna tawh ih innkuan ciatin cidam in a nasem thei tekding in zong ki lam en hang. Ih nasep na khempeuh ah Pasian phawkin, a ma awi loh nasep sem lo-in, ih sepna khempeuh amah ih biakna, a ma min ih thansakna suak sakin lungdam koh biakpiakna nei zel zel, nei den den ding hi hang.

Tu tungin ah, bang thu suut ding ih hiam cih leh, mi tampi ii a diksak kammal khat ahi, “KEI LEH KA INNKUANPIH TE’N TOPA NA KA SEM DING UH HI” cih Joshua kammal suut ding hi hang.

Joshua in Israel mite makai in Jordan gun kantan pihin, Jericho kulhpi te Pasian vangletna tawh satkham in, Canaan gam a tunpih khit ciang Israel minam a tuam tuam teng a ki lawm a ki tuak tekin Canaan leitang hawm sak dildel hi. Tua a na sep teng a zawh dildel khit teh Israel mi a beh beh a bawng bawng in a lutang teng kaikhawm in Pasian a maan leh a maan lo pasian dangte koi teel zaw ding, Pasian maan biak leh be vet, a maan lo pasian dangte biak leh be vet, sawh hel neknuk se lo dingin thu a hilh cian dildel khit cianga a taangko kammal ahi hi.

No dang dang te’n na ut ut un, a dang dang peuh na bia uh zongin, KEI LEH KA INNKUANPIH TE’N TOPA NA KA SEM DING UH HI, cih tawh khensatna leh thu khupna tawh hong taangko hi. Hih kammal pen mi tampi in diksa in thu genna mun tampi ah ki paulapin, Innkuan, inn thunget, innkuan Jubilee te bangah thu bulphuh a a ki la mun mah mah Laisiangtho mun hi a, Joshua 24: 15 pan a ki la hi.

Mi’n zong hoihsa, ken zong hoihsa ing.

Ahi zong a kammal a hoihsa, a Laisiangtho khaan a lotngah bek ih hih a, a tak tak a, a zangkhia lo innkuan ih hih leh bel, ih genna leh ih tatna a ki leh bulh hong suak dinga, Topa Jesu’n Pharisai te thu kham hilh sia te tawh ki sai a agen ngei, “amau thu hilhna a maan te zui unla, a hih hangin amau gamtat bang in ta kei un,” a cih pawl suak thei kha ding hi hang.

Hih Joshua kammal te a dawl dawl in en cian sukin, ei ki bulh leeng, a masa in, KEI, tua khit teh LEH, tua a zom in KA INN KUANPIH TE tua teng in TOPA NA KA SEM DING UH hi, ci ngam hi.  Hi kammal a pau laitakin Joshua in mi honpi ii lutang ahihna tawh leh, a mau innkuan lutang pa ahihna tawh a gen hi. Amau innkuan bangzahpha a kua teng hi a, tapa bangzah tanu bang zah, mo bangzah, tu bangzah cih pen thei lo hi hang. Kua teng peuh hi-in, bang zah bangzah pha ta leh, amah zong kum bangzah pha ta a, bang zah in teek ta a, bang tan vei nungta lai ding hi se mah ta leh, a ma’n a innkuan buppi a Topa bia a Topa na asem zo dingin khentat ngam hi. Pasian teel ngam hi. Ki ciam ngam hi. Taangko ngam hi.

A masa in, KEI cih kammal thu ah en phot ni. Hi lai ah, “KEI” a ci pen Joshua hi a, Pa bel ahihna tawh a cih hi. A zi ii kammal hilo, a ta te khat ii kammal zong hilo, a mo nu khat ii kammal zong hilo hi. Tua mah bangin tu ni’n no innkuan sunga pa bel ahi, lutang pen pa in Pasian nasem dingin “KEI” na cih masak ngam kul hi. Na cih masaknop kul hi.

Pa bel ahi innkuan lutang ahi pawl khat, nekna dawnna lam sang bek ah pa bel hihna leh “KEI” cih kammal zang nuam bek a, Pasian vai lam peuhmah a KEI ci nuam peuhmah lo thei hi. Nipi ki khop ding nangawn a zi a ta te makaih hetlo in, “no teng va ki khawm vuau,” ci lel mawk hi. Na dang ah pa bel hihna suanga KEI ih cih nop leh Pasian thu ah zong ih pa bel hihna suang in KEI ih cih ngam kul hi.

KEI zom ah LEH in zom hi. Topa nasem dingin kei bek hi lo-in ka seppih ding mi om lai hi. Kei bekin sem in a dang tengin ko innkuan hauh nading na sem ding hi, cih na hi lo-in kei bek hilo, sep khop pih ding pawl nei lai-ing cihna hi.

Tua a LEH ii zom dingte kua te hong hi ding hiam, Kei leh ka zin te, cilo hi. Kei leh ka khuapihte zong ci lo hi. Kei leh mi khua te zong ci lo-in amah tawh a ki nai pen pen, amah tawh a ki sai pen pen teng ahi, KA INN KUANPIH TE ci hi. Pasian thu ah a innkuanpih te makaih zo hi. Uk zo hi. Vaihawm ngam hi. A zi kih ta lo hi. A zi in zong Pasian it hi. A ta ten a mo te, a innkuanpha zah zahin Pasian it uh hi. Khat in biakinn zuan, khat in phai tam lam zuan, khat in gam lam zuan, khat dakgin eu lam ah pai, khat dakgin un lam ah pai, khat kalaipi ginna biakinn lam ah ki khawm cih hi zel zul lo.

Nu in ki khop hah kat mahmah, Pa in gam giak hah kat mah mah, Pa in Pasian na sem sem, ta in zu thawl na kem lum cih te bang hilo hi.

Taang pek akipan Pasian thupha ngah tak tak te a innkuan kuan mah a Pasian na a sem lii lii te vi ve hi. Noah a zi tawh a ta pa (3) tawh a mo thum tawh a ki nial a ki seel omlo in sing sui, sing nawn in kuan khawm lii in teembaw lam lii lii-in tembaw sungah lut khawm lii uh hi. Abraham, a zi teek Sarah tawh thu kim in zin do-in, a tapa Isaac tawh thu kimin nuntakna tawh biakna in na ki pia ngam hi. Nupa pawlkhat ta zong nei nai lo, mihing tang 2, Pasian thu a ki thu paw zo lo om thei hi. Naomi leh Ruth te mota, mi nam ki bang zong hilo, a ta (or) a pasal om lai cih zong hilo, teek ta mota ki thu pua-in a mo Ruth in, “Na minam kei minam, na Pasian kei Pasian, na ki vui na kei ki vui na” ci-in na suul zuih zo ahih man Jesus khanggui hong suak hi.

A tawpna ah, KEI LEH KA INNKUANPIH TE IN bang hih ding, TOPA NA KA SEM DING UH, ci, Pasian maanlo tampi om taleh, dawi ahi a, kha dang tampi aom zong, ko simloh no dang khempeuh in a dang dang kha te na teel uh zongin, Ko in TOPA PASIAN teel ung. Topa Pasian be nung. Topa Pasian na sem nung. Topa Pasian deihna bangin na sem nung. Topa Pasian ading in ka nuntakna uh zang nung, Topa Pasian ading in nungta nung, a ci ahi hi. U te nau te ei e, ih innkuan bup mahin Top ana a sem tek mah ih hi nam. Kua tengin sem a kua dang tengin bang na sem. Tu in Joshua bangin khen tat in Topa teel in ih innkuan bup ap ni.