Vut Siangtho pawini

Vut Siangtho pawi tawh kisai theih huai thu nam (5)
1. Christian khempeuh in bawl lo
Vut siangtho pawi pen Christian khempeuh in bawl lo hi. Christian kimkhat in sangin a zat uh hangin Christian kim khat te in sanglo uh hi. A tamzaw in Catholic Christian te bek in a bawl pawi ahi hi.
2. Vut siangtho pawi in Lai Siangtho siksan
Siampipa in I tal tungah vut hong nuhin “Nangin lei vui na hi aa, lei ah na ciah kik ding thu phawkin” ci-in Lai Siangtho kammal gen hi. Tua kammal pen Pasian in Adam leh Eva te Eden huan sung pan ahawlkhiat lai-in a zat kammal ahi hi. Lai Siangtho lui ah mawhna pan a kisikkik mite in vut lak ah ki bual in puan hampi silhin amawhna uh hangin kap hi cih thu ki mu thei hi. Eite in a si nam I hi aa, sihna thu I sansiam nading hong hilh hi.
3. Vut siangtho pawi a kipat hun
AD 11 hun lai pekin na ki bawl khin hi.
4. Vut
Tua ni aa ki nuh vut pen Topa Jesu a sihma, Singhiang siangtho pawini in a ki zang singhiang te hal in tua pan a ki ngah vut ahi hi.
5. Ngimna
Vut siangtho ki nuhni pankipan Catholic thuzuite Vuahun sungah ki lut ta hi. Vua hun pen ni (40) ki ciangtan hi. Kum cing sa te in an tang, sa tang hi. Nisim a nek an leh tui te ki deekin tua te lei nading sum te kholin a cimawh zaw deuhte ki pia hi. Topa Jesu in sehnel gamah ni (40) sung, antang in a om na thu phawkin ei ii Kha nuntakna thaksuah sak hun ahi hi. Lei vui I hihna ki phawkin a tunga gen sa te ki puahphat hun ahi hi.