Tonu Maria azahtak mahmah Misiangtho Anthony of Padua

Misiangtho Anthony of Padua in ama nuntakna sungah Tonu Maria a zahtak mahmah khat ahi hi. Amah bek in Tonu a zahtak hi lo-in ama Siampi pihte, ama thuzuite leh amah a zahtak mite khempeuh in zong Tonu a zahtak nadingin hanthawn den hi. Amah tawh aki thei mite kiangah ama gen zawhzahin mi khempeuh in nikhat in a tawm pen Ave Maria thungetna (3) vei a nget nading hanthawn den hi.
Anthony in tua bangin a genna hangin thuzui pawlkhat te in Ave Maria thungetna nikhat (3) vei bek ngen ding acihna hi ci-in telkhial thei hi. Tua bang hilo hi. Misiangtho Anthony cih nopna in Ave Maria (3) vei lunglut takin ngen ding a cih na hi. A diakdiak in nitak lup kuan ciangin ki ngen phadeuh hi. Kumzalom (14) ki pat lam in Europe gam ah Ave Maria (3) vei ngetna in ngeina khat bang hi-in mi atamzawin ngen uh hi. Kum khat sung tawntung angente Pope in Indulgent ngah nadingin phalna pia hi. Tua hunin Pawlpi amakai Pope pen Pope John XXII ahi hi. Aman 1318 pan 1327 hun sung Pawlpi makaih hi.
Misiangtho Anthony in Tonu Maria min lawh ding pen deih mahmah hi. Tua mah bangin hih anuai a kammal pen angah dongin simin nisimin ci den hi.
‘Nu Tonu Maria ii min in khuaizu sangin ka mukah khuam zaw hi. A zaknop mahmah la te sangin ka bil ah ngaih zaw hi. A kicing lungnopna hong pia hi” ci-in thungen den hi.
Pasian tungpan thupha nangen nuam hiam? Ave Maria thungetna (3) vei, Tothum Pasian tungah ap-in ngen in. Pasian ii a lamdang mahmah ngimna zong umin ci-in Misiangtho Anthony in gen hi.