Thupha Naak cih thu

RVA thuhilhna cih thulu nuai ah Thupha Naak cih thu kikup dingin kong telkhia hi. Leitung nuntaak tomkal sungin mi nuamsa leh mi hampha om aa, mi genthei leh mi hamsia cih zong na om veve hi. Nang leh kei in koizaw teel ding ih hi hiam? Ni khat thutawh a ki teel thei hi peuhmah loin eimau tekmah in nisim in ih nuntak pih ding lampi khat ahi hi.

Mi hampha leh mi nuamsa ih cihte in hauhna leh liatna, midangte tung aa ukna leh thu neihna a neite hipah lo hi. Ahau pen pa zong thupha ngah ci in ki ngaihsun khalo thei aa, bangmah neilo aa a zawngpen pa zong a hamsia thupha a taan in ki ngaih sun lo thei hi. Mi hanpha leh mi nuamsa ih cih ciangin ki-itna nei, midangte nawngkai saklo, a nasepna leh a tup a sawn nate ah a lawhcing mite pen mi hampha leh mi nuamsa hi ci-in ka ngaih sun hi. Lai Siangtho sung Paunak 20:7. "Mi khat thumanin mawh baang loin a nuntak leh, ama suan le khakte in thupha a ngah uh hi" na ci hi. Thupha cihpen sepna leh zuihna tungtawn aa hongpai ahih lam hih Lai Siangtho tungtawnin ki theitel hi.

Thupha ngah minamte ih hih theihna dingin ei mimal khat ciat pan kipan, innkuan, pawlsung, khuasung, gamsung leh leitung ih om na peuhpeuh pan in thumanin mawh baanglo aa ih nuntak ding a kisam ahi hi. Ih pu ih pa ten Paunaak khat nanei uh aa 'Nu leh Pa thumang a nahlawh pek' na ci uh hi. Tua a deihna in Nu leh Pa thu mangte a sepna ah lawhcing a cihna ahi hi. Thupha naak pen ih pianna nu leh pate tungpan zong ahih lam hong phawk sak hi.

Hih RVA a za a ngai, sak leh khang kiim leh paam, tuipi gal aa om u leh naute ih zak thu hoih thu manphate nuntakpih aa Leitung thupha Vantung thuphate a ngah kim ciat dingin Topan tu leh a tawn tungin hong ompih tawntung ta hen. Lungdam.