Muhdahna in Hingkeuna Guutui       

Muhdahna in hingkeuna guutui tawh kibanghi. Ihneulai in muhdahna thu akigen tampi i-za hi. Mi mudahlo dingcih thu zong i-za zelzel hi. Ahizongin muhdahna in bangdan taktak hiam cih ihtelkei kha thei dinghi.

Muhdahna ii kipatna in athupi hetlo thupeuh nahi thei hi. Muhdahna in gitlohna sangin dahhuaizaw lai hi.

Mimudah thei te pen guutui dawn tawh kibang hi. Amuhdah mi tawh akithuah, akizom khempeuh nangawn ban muhdah thei lailai uhhi.

Mimuhdah te in, ama mailam thuding hitaleh, anu apa maitang hita leh, a-u anau maitang hita leh khualna ding lungsim hoih neizo nawnlo thei uhhi.

Tua thu mahmah in amah ahingkeukeu sak ahihi. Athupi hetlo thu, ki enna, kigimsiitna cihte tungah muhdahna bulphut in, kiamthei lo in, amuhdahna lungsim pen nisim in khangkhang thei hi.

Muhdahna in theihna beisak in, hoihna beisak thei hi. Muhdahna in ki pawlkhopna susia in, kikhenkhapna piangsak hi.

Muhdahna in, asia apha khenthei nawnlo in, thangpaihna leh siatpauna siattatna pokhiasak hi.

Muhdahna in, amuhdahmi nu/mipa bek hilo in, mitampite susia in, bawlsia a, suplawh gimlawhsak thei hi.

Muhdahna in nahoih napha khentel theihna lungsum susia in, amuhdahmi akimuhdah pih ding, akigensiat pihding, leh akilangneih pihding bek ngaih sun hi.

Muhdahna in amuhdahmi sangin, amah leh ama itlengaih te tungah supna lianpi tunmasa tawntung ahihna thu mimuhdah te in phawkkha ngeilo uhhi.