Mother Theresa leh kiniamkhiatna nam (15)

Mother Theresa leh kiniamkhiatna nam (15)

--------------------------------------------------------------

Mother Theresa hong hilh kiniamkhiatna nam (15) te...

1. Nang’ thu ahi thei zah in pulaak kei-in

**********************************************

Mi tawh na kiho ciangin, nang bek in hun buplakin pauna leh nang leh nang ki phat luatna te pelh in. Hong bawl pa in nih vei ngai-in, khat vei pau nadingin bil nih leh kam khat hong pia hi.

2. Nang’ nasep leh nang vai te bek lunglut in la, midang te’ vai ah buai lua kei-in

**********************************************************************

Midang te vai-ah kisai lo pi, va buaina in thuman lo khensatna tawh mite mu thei in, amah sang siamzaw, thei zaw ing cih kiphatsakna lungsim khangsak ahih manin kiniamkhiatna tawh ki lehbulh hi.

3. Thu theih nop luatna pelh in

***********************************

Nang tawh kisai lo pi-in, midang te’ sungthu(thusim) theih nopluatna, midang te hoihlohna gensiasia, mawhsakna cih te in kuamah phattuamna pia lo ban ah kiniamkhiatna tawh kilehbulh hi.

4. Midang te’ sungthu ah kihel se kei-in, buai se kei-in

************************************************************

Mi te in amau nuntakna, amau leh amau in khensat hen. Mi nuntakna sungah nang buai kei-in. Amau te na hoihsak nop leh thuhoih thupha gen pih in. Nang deih na bang bek hih sak ding hanciam kei-in. Nang kiphatsakna tawh midang te zang kei-in.

5. Na heh nading in, hong hih mi te lungduai takin sansiam in

********************************************************************

Nisim ih nuntakna ah midang te in ei tungah bangci hong mu ding, bangci hong ngaihsun ding, hong koi ci hopih ding cih te ih dal zawh loh hangin, ei lam pan koi ci dawng kik ding/ thukkik ding cih ih dal zo hi. Mi te kampau, gamtat na te ahoih lamtawh ih thuk kik zawh nading, hanciam ding kisam hi.

6. Midangte’ hong simmawhna te nalungsim ah sawtpi koih in lunggim kipia kei-in

********************************************************************

Midangte’ hong simmawh, bawlsiatna te ih lungsim sungah sawtpi koih leng, muhdahna leh galbawlna hong piang thei hi. Midangte’ hoihna, phatna te ih et theih ciangin kiniamkhiatna zong hong khang ding hi.

7. Midangte’ hong thuhilhna te, nang naman zaw zongin lungduai takin sansiam in

****************************************************************

Mi-in thu hong hilh ciangin a tamzawin ei leh ei ki dalna in “ kei hi keng, ken hih keng, kei thu hong hilh dingin nang kua na hiam” cih bangin ki gen thei hi. Ih khialhna hong hilh te, kiniamkhiatna tawh sansiamin zui zo leng ei ahampha ih hi a, amau akhialh leh zong avek in phisian kul lo hi.

8. Nang deih na sangin midang te’ deihna masa sak zaw in

*****************************************************************

Ei deihna te nialin midang te deihna masak theihna gamtat hoih cihna hi. Gentehna in—an sai ah lawm leh gual te tawh an nek khawm ciang, amau duh danin nek pihna cih bang gen nopna hi.

9. Mi te’ simmawhna, bawlsiatna te sansiam in

****************************************************

Lingpaak in bangbang min tawh ih sam zongin ama namtuina kikhel ngei lo hi. Mi’ gensiatna in ei ii hoihna phatna te hongkiam sak lo hi. Tampaya ih suuk ciangin atui ih ngah hangin, mi khat suuk leng ama siamna, hoih na, amah bang ci-mi cih te hong kilangh ding hi.

10. Midang te’ hong thupi sim lohna, hong awlmawh lohna te sansiam in

******************************************************************

Mi hing te’ kiphatsakna in midang te’ pi muhna leh phatna te lunggulh hi. Kiniam khiatna in tua te tawh kilehbulh hi. “Mite’ pimuhna ngah loh hangin phamawh lo hi. Pimuh huai mi khat nasuah zawh nading bek in hanciam in”.

11. Na nungzang pan temtawh hong kidawt leh zong maitai lel in

**********************************************************************

Nuntakna sungah ei tungah ahoih lo mi, hong haza mi, ih mawhna ding zongin hong ko mi cih te atawm atam ih tuak kha ding hi. “Nang na hoih leh kei sia lo ding” cih hi lo-in, ‘nang na hoih aa na hoih kei zong, kei hoih den ning’ cih lungsim hoih tawh thuk zawh ding kisam hi. (Wis 15:1)

12. Midangte’ pimuhna, phatna ngah nading zong kei-in

*************************************************************

Nasep khat peuhpeuh ih sep ciangin lungsim hoih tak tawh sep ding kisam hi. St. Francis Assisi bangin “midang te’ hehnepna kazong sangin midang te tungah hehnepna apia zo mi, midangte’ theih siamna ngah nading sangin midang te tungah a theisiam mi, midangte’ tung pan it na ngah nading sangin midang te tungah it na apia zo mi” hong hi sak in ci-in hanciam ding kisam hi.

13. Nang’ pilna siamna leh zaliatna te muang lua kei-in

************************************************************

Kei pilna, kei zaliatna tawh ki tuak mi te bek tawh kithuah ding ci-in, kiliatsakna tawh mizawngte, laitan nei lo te tungah simmawh bawlna te pelh ding kisam hi. Mi thupi te in a kiniamkhiat pen te hi cih tel in.

14. Thu kikupna ah nang lampan na man mahmah phial zongin midangte’ muhna leh ngaihsutna te sansiam in

********************************************************************

Thu kikumin, kinialna te ah ei man mahmah ta leng, midangte muhna leh ngaihsutna te masak in, mi te tungah kampau na tawh zawhna sangin ei mahmah ii kiphatsakna, kiliatsakna, huaihamna te ih zawhna in thupi zaw hi. Kam kinialna tawh midangte tungah zawh na sangin ei leh ei kizawhna in hoihzaw hi.

15. Nasep teel ding aom ciangin, aniam pen leh a haksa pen teel masa den in

*********************************************************************

Khat veivei ciang, a niam pen leh ahaksa pen te sungah suangmanpha ki seel thei hi. Gentehna in---(pawi khat peuh ah kuangsil, inn phiat). Topa Jesu in kham leh ngun tawh a kibawl inn sungah hong suak lo in, kiniamkhiatna lianpi tawh Bawng annekna kuang sungah hong suakna in kiniamkhiatna ii ahoih pen lamlah na hi.