Leii ii mawhna nam (9) te

Leii ii mawhna (9) 1. A zuau thei Leii; Zuau thu a gen thei leii in Pasian muhdah nam 7 te sung pan khat ahi hi. (Paunak 6: 17) Zuau thu gen te in meikuangpi sungah kia ding hi. (Rev 21: 8) Dawimangpa in zuau thu agen, mi zuau thei te’ pa ahih lam zong phawk ding ki sam hi.

2. Phat khem thei leii; Topa in kiphatsakna a piangsak leii, phat khemna muk khempeuh at khia hen; I leii tawh i gualzo dinga, i mukte eima neihsa ahi hi; I topa kua ahi hiam? a ci uh hi. (Late 12: 3-4) Pasian thu um mite in midangte tung pan na khat peuhpeuh ngah nop manin a dang mi khat phat khem ding ki lawm lo hi.

3. A kiphasak leii; A kiphasak thei leii in mawhna nei hi. A kiphasak thu um mite in midangte tung pan pilna sin nuam lo uh hi. Pasian in a kiphasak leii pen mudah hi. Pasian in nang hong lapsang ciangin nang leh nang kiniamkhiat in.

4. Kampau a ki dawm lo leii; Thu tam gen leng khialhna kihel thei a, ahi zongin mipilvangte in kampau kidawm uh hi. (Paunak10:9) (Thuhilhpa 5: 3) sung ah “Lunggim luatna in mang hauhna hi a, thu tampi genna in haina ahi hi” ci hi.

5. Thu gen amanlang leii; A lawm ii pau hoih tak ngai lo-in a dawng kik pahpah te. A thu za khin nai lo pi a dawn kikna in haina leh maizum huaina ahi hi. (Paunak 18: 13) A kuamah peuh in thu ngai pahpah uh hen. Genkhia pahpah lo-in, heh pahpah kei uh hen. (James 1: 19)

6. Mi gensia thei leii; Mi khat peuhpeuh in na mai ah na hoihna a gen hangin nang theih lohna ah na thanemna te hong gen sia thei hi. “Leilu lam huih in guah a zuksak bangin gensiatna in hehna piang sak hi.” (Paunak 25: 23) Amaute in mi gensiathatna, Pasian muhdahna,kiphatsakna, gitlohna zia a thakthak phuatkhiatna, nu le pate’ thu man’ lohna tua mawhnate tawh a kidim uh hi. Amaute in ngaihsutna neilo, a ciampel, itna hehpihna a nei lo mi a suak uh hi. Tua banga a gamta mite in sihna dan a thuak ding uh hi, ci-in Pasian’ thukhenna thei napi-in amaute a gamtat uh tham lo-in, tua banga a gamta mite a thukimpih zawsop uh hi. (Rom 1: 30-32) Ziau thu gen in midangte zong a ki lem loh na ding un a suktuah mi te Pasian in mudah hi.

7. Mi gensia thei leii; Mi gensiat loh nading Late 15: 3 leh Paunak 18: 8 na te sungah hong kham hi. Mi gensiatna tawh dawi mangpa in thu um mite te khat leh khat hong ki khenthang sak hi.

8. Hamsiatna a pia thei leii; “Amaute’ kam, hamsiatna leh kamkha tawh a kidim hi.” (Rome 3: 14) Tua leii tawh eite in I Topa le I Pa I phat a, tua leii mah tawh Pasian a sun-a kibawl mihingte I samsia hi. (James 3: 9) Pasian in mi hamsia thei te mudah in vantung gam ah zong amaute ading mun omlo hi.

9. Thu ngaihsun lo-a kampau thei leii; “Thu ngaihsun lo-a kampauna in tem hiam tawh dawt bangin mi liamsak thei hi.” (Pau 12: 18)

Tua hi a ulehnau te mawhna sungah hong tun thei I leii ki dawm in hi mawhna (9) te I pelh zawh na dingin hanciam ni.

#Thuhilhna, #Leei, #Mawhna, #RVA, #Kalaydiocese,