A Lauhuai lungsim

Thu hilhna cih thulupi nuaipan in a lauhuai lungsim leh gamtat zia 3 te cih tawh holung kum khawm ni:

1. A thadah mite ( Lazy) Thadahna ih cih pen bangmah aa a kizang theilo khat hi. Thadahte pen a ziakai in, uisan uh aa, khantoh nopna lungsim neilo uh hi. Tua bang mite tawh kithuah kha kei-in hong lawh thei uh aa, hamsatna leh buaina khat peuhpeuh a thuakpih dingin hong pawl mat thei uh hi. Mawhna sungah hong tunpih thei uh aa, a hoihlo thu leh la khatpeuh a om ciangin midangte mawhsakin, a mau tungah a ki mawhsak lohna dingin paulap peuh zong thei uh hi. Midangte gensia uh aa, a mau leh a mau ahoih mah kisa in mi dangte mawhna bekmah mu thei uh hi. Tua ahih man in hih bang lungsim leh gamtatzia anei mite tawh kipawl kei-in nang aa dingin lauhuai hi.

2. A huaiham mite (Greedy) Huaihamna lungsim ih cih pen na khat peuhpeuh pen midangte sangin a tam zaw, a lianzaw deihna lungsim hi aa, duhhawpna zong kici thei hi. A huaihan, a duhhawp mite in na khat peuhpeuh a sepna uh tungtawnin a kilawm a kituak zah sangin a tamzaw ngahding lunggulh uh hi. A huaiham mite in lungkimna cih bang neingeilo uh aa, midangte tawh a kipawl theih dinguh pen hamsa mahmah hi. Sum leh paai, neih leh laam, min leh vang a deih na hangin midangte sup leh bai, nat leh sat ding phamawh sase lo-uh a hih man in mawhna sungah hong tunpih thei uh hi. Tua ahih man in hih bang lungsim leh gamtatzia anei mite tawh kipawl kei-in nang aa dingin lauhuai hi.

3. Itna leh Ngaihna a neilo mite Itna leh ngaihna ih cih ciangin midangte tungah muhdahna leh hazatna lungsimte neilo aa, deih sakna leh midangte hoih ding leh phat ding bek lunggulhna nei uh hi. (Matthew 5:44) "Ahi zongin ke’n kong genin ah, na galte na it unla, hong bawlsiate’ aading thu na ngetsak un." (Luke 6:27) "Ahi zongin ka thugen a za note’ kiangah kong genin ah: Na galte na it un. Hong mudahte’ tungah thupha na bawl un." Pasian deihna in ih galte tungah itna neihding, hong bawlsiate’ aading thu ngetsak ding leh hong mudahte’ tungah thupha bawl ding cih ahi hi. Tua hi aa mi khempeuh tungah itna neih ding cih ahi hi. Itna leh ngaihna a neilo mi-in amau pumpi zong it zolo thei uh aa, huaihamna, gitlohna, muhdahna lungsim tawk kidim uh hi. Tua ahih man in hih bang lungsim leh gamtatzia anei mite tawh kipawl kei-in nang aa dingin lauhuai hi.