Khasiangtho Ngah Aci Mi: Sittel Masakding Pelmawh Kisam

Khasiangtho kanei hi, Khasiangtho kangah hi aci mi khempeuh uppahpah loh nading leh tuabang in Khasiangtho kangah hi, Khasiangtho in hongsawl hi, aci mite sittel, ettel, kantel in, aman leh amanloh khentel masak dingin Laisiangtho in hilh hi. Tu hunciangin, mun khempeuh te ah, Khasiangtho thu vive kigen in, Christian akici mitampite sungah Khasiangtho kangah hi aci mi tam cihtakin kitam hi. Laisiangtho sungah,
"Ka it lawmte aw, kha ka nei aci mi khempeuh’ thugen umkei unla, tua thute Pasian kiangpanmah ahi hiam, ci-in kantel masa un. Banghanghiam cih eh leitungah kamsang a kineihkhem tampi hong om khinta hi" (1 John 4:1) ci in, hong hilh hi.
Laisiangtho sung mundang khat ah, Paul in hici bangin nagen hi:
"Nidang hunciangin, khaninte khemna leh dawigilo te thu akigente thu nungzui in, mipawlkhat te in upna pan apaikhiat ding hun hong tundign hi cih thu Khasiangtho mahmah in teltakin gen khin hi" (1Tim 4:1) .
"Note lakah sia manlo hong om dinghi. Siatna a piangsak thei thuhilhna a manlo thute hong lutpih simin, amaute mahmah a tankhia Topa nangawn nialding uhhi" (2 Peter 2:1).
Khasiangtho kangahhi, Khasiangtho in hongsawl hi ci in, amah leh amah “sawltak akineihtawm” te tawh kisai in, Laisiangtho hong hilh na ah:
"Amaute pen sawltak taktak hiloin, sawltak a kineihkhemte hi uh a, a nasepna uhah zong zuau-in, Christ’ sawltak taktak a battheihna dingun a meel kiseel ahi uhhi. Tua pen lamdang sakding hilo hi. Satan nangawn Pasian’ vantungmi tawh a kibangin kibawltawm thei hi" (2 Cor 11:13-14).

Mi pawlkhat te in amaute pianpih thugensiamna, leitungpilna leh siamna tuamtuam te zangin, Pasian nasem – Pasian sawltak ka hihi, Khasiangtho in hongsawl hi ci in, amau leh amau sawltakza kipia tawm in, mite lakah Sawltak nasep sem in amau te kivakna in nei uhhi cihthu Laisiangtho in hong hilh in ah:
"Kote’ hong sawllohpi-in ko kiang panin mi pawlkhat hong pai-in a thugenna uh tawh note hong buaisakin hong lung-amsak hi, ci-in kaza uhhi" (Sawltak 15:24).

Nungzuipi te tungpanin phalna, sawlna ngahlo in, amau le amau sawltakza kipia tawm in, amau le amau sawltak nasep asemtawm pawlkhat ii thugen na hangin, Antioch khua a om Christian thuzui mite khen nih khenthum kisuahsak in, kitotna piangsak uhhi. Tua bang mite pen, nungzuipi te sawlna, phalna tawh apai hilo ahihman un, Jerusalem khuapi ah nungzuipi te leh pawlpi sung vaipuak neite in, kikupna pi nei in, tua panin, tuabang a amaule amau sawltakvaipuak akiguan tawm mite khaktanna leh, khinkhiatna thu khensatna laipi ana bawlna hihi.

Tuaban ah, Khasiangtho letsong ngahna, cinadamsak theihna, kamtuam pauna, misisa thawhkiksak theihna a kipan nalamdang tuamtuam bawltheih nate in vangam hongtunpih hi masa loin, gupkhiatna sung hongtunpih hituanlo hi, cihthu athupi mahmah khat ahihi.

Banghanghiam cihleh “sawltak kineihkhemte” in tua bang nasepna te, Pasian nasepna hi ci in, kisaktheihpih in, mite zolna in, semphadiak leh genpha diak uhhi. Tua bang mite tungah eite Topa, honpa leh gumpa ahi Jesu Christ in agen in ah:
"Tua mite in, Topa aw, nangma min tawh thu hilhin, nangma min tawh dawite hawlkhia-in, nangma min tawh na lamdang lian tampi bawl hilo ka hi uhhiam?’ hongci ding uhhi. Tua ciangin keimah in amaute kiangah, ‘Note ka hong thei ngei kei hi. Siatna a gamta mite aw, kei kiang panin kihemkhia un,’ kaci dinghi" (Mt 7: 22-23).