Kalay Zone sunga om Siampite Pasian thu lungngaihna

Tuni Kalay Zone sunga om Siampi teng in Kha sim in a bawl uh Pasian thu lungngaihna pen Diocesan Pastoral Centre, Kalaymyo ah (14.5.2022) ni-in nuamtak in ki bawl hi.

Pasian thu lungngaihna hun sungin Rev. Fr. Andrew Thang Ngaih Lian (PP of Ingyinkhone) in Pasian thu tawh kha-an vak na hong nei-in tua sungah Pope John Paul II gelh Encyclical Letter sung pan Pastores Dabo Vobis bulphuh in Thuzuite in khanuntakna a ngah nangin Siampite in bangci bangin makaih in nuntak pih ding cih thu bulphuhin Siampite nuntak zia ding hong gen hi.

Hun man (thu zaksakna hun) ciangin Rev. Fr. Maximian Pau Sian Mung (Chancellor of the Diocese) in Mai Kha ciangin, koi mun ah hih ding, kua in kha-an vakna pia ding cih thu te hong gen hi. Tua khitteh Rev. Fr. Damian Zam Sian Dal (PP of Phai, Sacred Heart Church) in Diocese sungah Sacramentu te piak zia tawh kisai-in Parish kim in a kibangin zat kim ciat ding thu tawh kisai kikuppihna hong nei hi. Tua banah Rev. Fr. Kap Tung Nung (PP of Tahan St. Theresa Church) in Han (Cemetery) ah Missa Bawlnang inn lam ding tawh kisai hong pulaak khia hi.

Tua khitteh Rev. Fr. Raphael Suang Cin Khup (Procurator of the Diocese) in Siadawpa leh Kalay Zone sunga om Siampi te sung pan Pasian thu lungngaihna sungah a hong kihel manlo te ii a hong kihel theih loh na (a hang, a buaina) te uh hong pulaak khia hi.

A tawpna ah Maikha sung Pasian thu lungngaihna pen Tahan St. Theresa Biakinn ah ki bawl ding cih thu leh Rev. Fr. Joseph Kap Tung Nung in Kha-an vakna hong pia ding cih thu kipsakna ki nei-in tua khitteh sun-an nekna tawh tuni Kalay Zone sunga om siampite Pasian thu lungngaihna ki man siang hi.