Homily By Rev. Fr. Joseph Zo Mung (Jan 2.2022)

Epiphany Sunday
Mt 2 : 1 – 12
Tuni pen Epiphany of the Lord ci-in Pawi lianpi I bawl hi. Epiphany cih kammal pen Greek kammal pan hong pai hi-in kilahna hi. Cihnopna in Aksipi lamlahna zui-in Gentile mite tungah Topa Jesu a kilahna pawi cihna hi. Tua pen tuni I sim Lungdamna Laisiangtho in kipsak hi.
Banghang in hite hong gen ka hi hiam cih leh leitungah I et ciangin biakna tuamtuam om in, ko pawlpi bang kumin register ngah ci-in pawlpi khat leh khat ki gen uh hi. Ahi zongin Catholic Pawlpi ahih leh register kul lo hi. Bang hang hiam cih leh Topa Jesu hun pan a kipanto ahih manin I dictionary te, Mang kamin I zat laimalte zong a tua banglian mah in a kizang ahihna thu tel takin hong gen nuam ing.
Banghang hiam cih leh Topa Jesu hong kilah hunin Pawlpi om nailo hi. Topa Jesu hong suah cil a Kamsangte gen kholh thute a zui toto teng pen Catholic Pawlpi ahih manin Register kul lo cih I theih ding kisam hi. Tua hi a, Topa Jesu hong kilahna pawi bang hangin ki bawl hiam? Kamsang tampi in koi mun koi munah hong suak ding ci-in genkhol in, hong tangko himah taleh amah hong kilahna pawi I bawl tangtangna pen mipil tampi om himah taleh amah a mukha, a biakha mi tawm mahmah ahihna hang ahi hi.
Lungsim kiniamkhiat in, Khasiangtho lamlahna zui-in, lam man zui lehang, Topa Jesu in lungsim takpi tawh a zongte tungah amah kilak a, kiniamkhatna tawh a zongte in Topa Jesu mu hi cih tuni I pawi bawlin hong kilangh sak hi. Eite khat ciatin hih pawi I bawlna hangin Topa Jesu ken bangci zon ka hiam cih, I zon dan ngaihsun in kei ii pilna siamna bek muang ka hi hiam? Khasiangtho lamlahna muang ka hiam cih I ngaihsut ding kisam hi.
Tua khit ciangin ken bang letsong pia ding ka hi hiam? Tuni in Topa Jesu a bia mipil thum te in Topa Jesu pen Pasian ahihna, Kumpi ahihna, mihing ahihna te tawh letsong apiak mah bang un, ken zong ama a ding bang letsong pia ding ka hi hiam cih ngaihsunin eite in Topa Jesu hong suahna Bawngbuk ah pai-in mipil thumte ii apiak mah bangin eiten zong I piak ding kisam hi.