Citpiakna

“Thungetna tawh nungta lo, mite phattuam nading ki piakkhiat nopna lungsim neilo, ei mawhna hangin kisikkikna leh mawhna danlohna neilo pi-in na I sepsep hangin I nasepna te tangtung zo lo ding hi.”
Misiangtho Vincent De Paul in ama congregation ah alut nuam te kiangah “kong it ka ta te aw, mi cimawh zawngkhal te in eite adingin thu sia ahihna thu cik mah hunin mangngilh kei un. Tua ahih manin mizawngte, zahtakna tawh ho pih in, panpih un. Amaute’ hong nget bangin hih sak un” ci-in vaikhak hi.
Mizawngte tungah piakkhiat ciangin mi a tamzaw in amau zat theih nawnloh vante bek piakhia uh hi. Tua bangin na hihna hangin mizawngte ninbung khat bangin a ngaihsun na hih na uh na phawk kha uh hiam? Tua bangin amaute tungah bawlna in amaute’ mihing hihna ii manphatna a thupisim lo tawh kibang hi.
Eite in koi ci bangin piakhia ding cih I kan ding kisam hi. Piakkhiat nopna lungsim, hehpihna lungsim khat bek tawh piakkhiatna hi lo-in, piakkhiatna pen tavuan khat bangin sep ding ahi hi.
Mother Theresa in a lawmte kiangah “mizawngte tungah a ki zang thei nawnlo van te, zat val te piakna pen ka deih kei hi. Na piakkhiat uh ciangin na piak uh mite tungah kiphatsakna lungsim, nenniamna mit cih te amaute adingin kisam lo hi. Amaute’ kisap in note ii itna man leh hehpihna ahi hi” ci-in gen zel hi.