Bishop Felix (Holy Innocents) Dec 28, 2021

December 28 ni-in naupangte pawi limtakin I bawl hi. Banghang hiam cih leh Herod kumpipa ii bawlsiatna hangin pasalno naupang kum nih nuaisiahin sihna na thuak uh hi. Topa Jesu ading hi. Herod kumpipa pen angongtat, a ukna kipletin, adeih luat manin unau sanggamte zong donlo, khual lo-in, a that ngampa hi. Ama tokhom a tut nading ahih nak leh a zi a ta te nangawn suakta sak lo-in, anuntakna uh alaksak ngampa ahi hi. Azi Mariam leh apianna a nu, a tate nangawn zong that sak ngam tazen hi.
Herod kumpipa in ama thuneihna atanding a lau manin sep ding akilawmte sem lo-in, sep loh ding teng, bawl loh ding teng asemsem, a bawlbawl ahi hi. Hi zahtakin a gilo Herod in Jesu kumpipa hong suahna ah hongpai mipil thumte kiang panin Jesu hong suahzia theinuam, bia nuam hilo in that nuam hi. Tuni thuzuite in I nget dingin ah mihingte thuneihna I neihluat ciangin hih loh ding teng ki hih kha in, sep loh ding teng kisem kha hi cih Herod kumpipa ii nuntakna zia tungah I mu thei hi. Herod kumpipa in nuntakna sangin thuneihna thupi sakzaw hi. Tua thuneihna hangin asia apha khentel thei nawn lo-in, thuman thutak zong thei zo nawnlo dongin amah hong hai ta hi.
Herod kumpipa ana deih luat manin Jerusalem khua kim a om, mawhna anei kilkel lo naupangte in nuntakna suplawh hi. Naupangte nulepa te in bangzah takin khasia ding, lungleng khuangai ding ahi uh hiam I ngaisun zo kei hi. Tua ahih manin Laisiangtho in Topa in hong cihna ah Rama khua ah ‘aw’ kiza a, tauna leh kahna aw ahi hi ci zen hi. Rachel in a tate adingin kap hi, a tate om nawnlo ahih manin ki hehnem zo lo hi ci-in Jeremiah kamsangpa in a genkholhna kum tampi in hong tangko hi.
Tua teh thuman thutak tawh suahtakna, suahtak nopna deihna ah anuntakna a bei lawh khangno tampi tak ki om hi. Tua te hangin khitui naptui tawh a thumthum a tautau zong tampitak om lai hi. Amaute ading zong thu I ngetsak ding hi. Pasian in hun a sak ciangin Egypt mite sila pan hong honkhia dingin Moses honpa gumpa sawl a, kumpi aana neite in bangzahtak in khaktan ding ahanciam hang khaktan zo lo uh hi.
Laisiangtho lui hun lai in Israel mite ahonkhia dingin Moses piangsak a, amah asuankha ding mi apiang teh alau tawntung Phalaw hangin pasalno ten sih lawh uh hi. Ahih hangin Phalaw in adeih pen ahi Moses that ngamtuan lo hi. Leitungmite mawhna pan hon ding a, Topa Jesu leitungah hong kuma, Herod kumpipa in pasalno kumnih nuaisiah that sakin, naungek Jesu a thahsakna, Pasian gelna mihingten susia zo lo hi cih hong lak hi.
Tua ahih manin kumnih nuaisiah naupangten bangmah a theih nailoh uh hangin a sihna uh tawh naungek Jesu Pasian tapa ahihna teci apangzo uh hi. Tua ahih manin naupangte zong nu leh pa te thumang ding. Tuni pawi I bawlna pen Topa Jesu in a nulepa thu amang mah bangin ei khangnoten zong thumang ding cih I deihna hi.
Misiangtho John Damascene in bang ci hiam cih leh “Singlamteh ciaptehna I bawl ding I mai azum leh Topa Jesu adaipih zo lo, teci apang zo lo Christian te I hi ding hi” hong ci hi. Tua ahih manin khangnote in Pa, Tapa, Khasiangtho cih singlamteh ciaptehna tawh Topa Jesu teci a pangzo te I hih zawh ding hanciam ni. Innkuan sungah khat leh khat I upna te ki etteh diamdiam in Topa Jesu tawh a kalsuan, zing vai nitak vai ahawmkhawm Christian innkuante I hih theih na dingin thungen ciatni.

Add new comment

5 + 1 =