Zosuan Khua, Ingyinkhone Parish, St. Patrick Biakinn ah Tonu Suanghawm Hon Pawi (7.10.2023)

Ingyinkhone Parish acing akem Rev. Fr. Andrew Thang Ngaih Lian ii vaihawm siamna tawh Zosuan khua St. Patrick Biakinn ah Oct 7, 2023 ni-in Tonu Sawnghawm Hon Pawi noptak in ki bawl hi.
Hih Tonu Suanghawm thupha piakna pen Kalay Zone Vicar Forane Rev. Fr. Joseph Kap Tung Nung in thupha piakna nei-in Missa Biakpiakna leh Pasian Kammal tawh kha-an vakna zong amah in makaih hi.
Hih pawi sungah Kalay KMSS Director Rev. Fr. Andrew Go Khan Nang, Kalay OSC leh RVA Director Rev. Fr. Joseph Thang Nen Zo Mung leh Pyidawtha Parish Priest Rev. Fr. Andrew Cin Go Lian te zong kihel thei in Siampi (5), Nungak Siangtho (3), Thuhilhsia (10) val leh thuzui mimal (400) kim kihel thei hi.
Zosuan Khua ah pen Catholic thuzui inn (6) bek pha in Zosuan khua aa Pawi a kibawl ngei sung pan Siampite leh thuzui mite a tam pen ni leh a nopci pen ni khat hi ci-in Nupi makai nu in a lungdamna thu pulaak khia hi.
Hih Tonu Suanghawm pen Magdalena Pi Ngem Khaw Niang leh a tu a ta te teng in a hong nusia sa 1. Anthony Pu Pau Khan Khup 2. Pius Pa Dal Go Thang 3. Donatus Pa Hau Suan Mung 4. Veronica Lia Cing Go Nuam 5. Clement Pa Pau Khan Suan te a phawkna un apiak khiat uh ah hi.
"Zosuan Khua ah Catholic thuzui inn (6) bek pha hi mah ta leh amaute ii hanciamna leh kithutuahna, a lawpna te uh ka muh ciangun kote in tha ngah mahmah in hih Zosuan khua ah a sum in teng (100) bang bei-in Tonu Suanghawh a lam ngam, a pia khia ngam hi ung" ci-in donors te lam pan Pa Kam Pau in a thangahna thu gen khia hi.
Zingsang nai (8:15) in vaidawnna ki pan in tua khitteh Tonu Suanghawm thupha piakna leh Tonu Pahtawina la sakna, Zosuan Khua thuzuite in Tonu Suanghawm a piakhia te tungah lungdamkoh thugenna, lasakna leh Letsong piakna, Tonu Suanghawm a piakhia te tung pan thugenna, lasakna leh letsong piakna cih te ki nei hi.
Tua khitteh Missa Biakpiakna tawh kizom suakin Missa Biakpiakna a man khit ciang မယ်​တော်ဂူအလှူရှင် te mah in Pawi sim mimal khat kim ciat pumpi aa ding an vakna nei uh hi.