Topa Jesu Siangtho Lungtang Pawi Ni Missa Biakpiakna, Phai (26.6.2022)

Topa Jesu Siangtho Lungtang Biak Inn

Topa Jesu Siangtho Lungtang Pawi ni pen Rev. Fr. Damian Zam Sian Dal (PP of Sacred Heart Church, Phai) ii vaihawm siamna tawh Kalay Diocese hongcing hongkem Bishop Felix in Siangtho Lungtang Biakinn Pawi Missa Biakpiakna pen Phai, Hlaingthaya ah bawlsak hi.
Hih Missa Biakpiakna sungah Siadawpa leh Siampi (6) in makaih hi. Missa Biakpiakna hun sungin Siadawpa in Siangtho lungtang pawi a hih manin itna tawh kisai bulphuhin kha-an vakna nei hi.
Amah in Pasian hong itna bang zahta in lian hiam cih leh Israel mite in Pasian thudonlo in a nungngat uh hangin Pasian in a itna kiam tuan lo, khahsuahlo in, nusialo in a tawntung in it ve ve hi. Pasian in eite ahong itna pen tehpih theih ding omlo zah dongin hong it hi ci-in tuni aa a kisim Lungdamna laisiangtho sungah Tuucing hoih pa in Tuu (99) te nusia in a mang khat amuh matengin zong hi. Eite zong mawhna pan ih kisik kik ding Pa Pasian in hong deih hi, ih vekpi in hongit hi cih thu te leh Biakinn sungpan ki-it ki lem takin Pasian min phat khawm ding cih thu te tawh kha-an vakna hong nei hi.
Kikhop tuah cingin Siangtho lungtang Parish panin Biakinn pawi ah akikhawm teng buhman leh voksa tawh an vak uh hi. Biakinn thak pen ki zo dekdek ta in hoih kisa tek pian ahih manin Biakinn en kawm ding leh Siadawpa bawl Missa angai dingin Myo sung Parish tuam tuam pan mi hong kikhawm uh ahih manin Biakinn dim val uh hi.

Add new comment

9 + 8 =