Tedim Myoma aa Siampi Inn Thak

Tedim Myoma aa Siampi inn Msgr. John Khup ii a lam pen tu-in mansiang dek dek ta hi. A pua lam teng pen a man hita in a sung lam zo siang nailo hi. International Standard tawh a ki lam hi-in hoih mah mah hi. 
    Inn mailam pan enleng dawl (3) hi-in a nuai ah dawl (2) om lai hi. A khang lam pan en leng dawl (5) pha hi.
    A nuai nung pen KMSS te Zum khan leh Recording khan ding hi-in, a dawl nihna pen An huan na leh annek na khan ding hi.
      A dawl thumna inn mai tawh a kitang suak na pen inntek Siampi te om na ding, a dawl li na pen Siadawpa khan leh Meeting Hall ding, a dawl nga na pen Siampite zin tun na ding ci-in Msgr. John Khuppu in gelkholhna tawh a lam ahi hi. A tung a khum dawn zong lamsiauhna ding, meeting bawl na ding cih bangin ki zang thei-in nopci mah mah hi.
     Kalay Diocese sunga Siampi inn a ki lamsa teng pan hoih pen hi. Hi bangin Tedim khuapi ah Siampi Inn hoih mah mah khat ih lam zawh pen lungdam huai mah mah hi. A vaihawm Msgr. John Khuppu leh huhna a piakhia thuzui mite tungah lungdam mahmah hi. Thuzui mite upna pen a piak khiatna uh tawh zong kimu thei hi. 
    Mailam hunte ah thupha a bawl zo thuzui mi ih tam semsem zawh nang ih Biak Pa Pasian ei thuzui mimal khat kim tungah thupha hongpia ta hen! Amen.