St. Theresa Biakinn Pawi, Tahan (Oct 2, 2022)

Tahan St. Theresa Parish acing akem Rev. Fr. Joseph Kap Tung Nung vaihawm siamna tawh tuni (Oct 2, 2022) ni-in Tahan St. Theresa Biakinn Pawi nasia takin ki bawl hi.

Tua sungah Missa Biakpiakna pen Kalay Diocese hongcing hongkem Bishop Felix Lian Khen Thang in makaih in Missa Biakpiakna sungah Siampi (6) leh thuzui mi (800) kim bang kikhawm thei uh hi.

Bishop Felix in Kha-an vakna a hong neihna sungah Misiangtho Theresa ii hoihna phatna te thuzui mite in ih etteh theih dingin gen khiat na hong nei hi.
A diak diak in St. Theresa in a neu lai pek pan kipan in Pasian tungah upna picing a neihna leh a upna tawh kituak in hangsan takin gamtatna tawh a lah khiatna pen etteh huai mah mah hi, ei thuzui mite in zong ih upna te gamtatna tawh ih lah khiat ding kisam hi cih thu hong gen hi.

Tua banah St. Theresa in a neu tung aa kipan a cidam lo numei no khat hi mah ta leh a natna te Pasian a itna tawh thuak siamin lungkim takin a thuak zawh na te leh a sepna peuh ah itna masuan in na a sepna te ei thuzui mite in ih etteh theih dingin kiteel takin hilhcian na hong nei hi.

Tua khitteh tuni in ih sim Lungdamna Laisiangtho (Lk 17:5-10) na bulphuhin nungzuipi te in Topa Jesu tungah “Topa aw ka upna uh hong khangsak ci” ci-in thu a nget mah bangin ih upna te ih khansak ding a kisapna thu leh ih upna tungtawn in hangsan takin tetti pan ngamna ih neih ding a thupitna thu hong gen hi.

Tua a gen na sungah “upna tawh kisai a hih nak leh upna ki banglo Christian dangte tawh zong Compromise bawl ziau ziau lo ding” cih nopna ah tawm vei sung ki lem pak ding lametna tawh ih upna te nawl khin in ih ngeina te masak ding cih bangin hih lo ding, tawm vei sung ki pawl theih ding lungngulhna tawh ih upna te nawl khin in Pawl dangte gamtat bangin zulhtatin lam in diang ngei ngai ding cih bang dan te hih lo ding, ih upna Pasian tawh ih kizopna a hong khak tan thei a hoih lo gamtatna te pen a patna mah pan ki pan in peel pah cinten ding ci-in khauh takin hilhcian na hong nei hi.

Tua banah upna ih neih ciangin launa bei-in lungnopna kingah hi cih thu zong hong gen in tua a gen na sungah “Catholic Pawlpi sungah midangte, kumpi u lian te maitang zahtak na tawh a hih kei leh a mautung pan ngah ding lametna tawh Biakpiakna hun sungah mun pia tuam cih bangin ki zang ngeilo hi. Tua bangin U lian te zahtakna, Kihtakna leh Pawldangte munpiak na ih neih luat ciangin ih Pasian a ki nawl khin hita a hih manin hoih lo hi. Pasian tawh ki zopna ah Pasian mah numbat khatin koih in Pasian tungah upna kip nei leng a dang bang mah lau ding omlo in lungnopna ki ngah den ding hi.

Tua ahih manin Nungzuipite in a upna uh a khan na dingin thu a nget mah bangin eite in zong ih upna te a khan nangin thu ngen ciat ni. Ih upna te khangsak ni. Tua hi leh launa omlo lungnopna ih ngah den ding hi ci-in hanthohna hong nei hi.

Missa Biakpiakna a man khitteh inntek topa Rev. Fr. Joseph Kap Tung in Siadawpa leh Pawisim Siampite tung ahi zongin, Pawi sunga zat ding sum leh paai huhna a pia mite tungah a hi zongin, a kikhawm thuzui mite tungah a lungdamna thu hong pulaak khia hi.

Tahan St. Theresa Parish sunga om thuzui mite pen piakkhiatna zong hat bek thamlo in kikhopna ah zong hanciam thei mah mah uh ahih manin Siadawpa leh Pawi sim Siampite in zong tha ngah thei mah mah uh hi. Hunsiat kawmkal panin a kikhawm mite Biakinn sung, a tung leh a nuai ah a dim khitteh a pua lam zongah tampi om lai-in Biakinn bang neusuah pian ta a hih manin thuzui mite hanciam na pen thangah huai mah mah hi.

Thunget lasak te zong nopci mah mah ahih manin lasak na te leh Siadawpa thugen na te zong video tawh hong ki post lai ding hi.