Silva Jubilee of Pa Mark Tai Thio (Falam Lente)

Kanan Khua Kanmahgyi Parish aa teng Pa Mark Tai Thio ( Falam Lente) in Kanan Khua ah Pawlpi Makai (Upa) a sep zawh Kum (25) cinna Silver Jubilee pawipi leh a pian kum (77) a cinna Topa tung Lungdam kohna Pawipi pen January 1, 2023 ni-in Kanan Khua ah nasia takin bawl hi.
Missa Biakpiakna ki patma in Biakinn mai-ah Mualsuang thupha piakna ki nei hi. Mualsuang thupha piakna pen Kanmahgyi Parish Priest Rev. Fr. Alphonse Ngul Kho Mang tangin Kalay Diocesan Director of Social Communication and RVA Tedim Chin Service Rev. Fr. Joseph Thang Nen Zo Mung in hong neihsak hi.
Missa Biakpiakna a man khit ciangin Jubilee abawl, Pa Mark Tai Thio te Nupa Pawlpi mintawh Pahtawina leh Letsong piakna te nasia takin ki bawl hi. Tua khitteh Jubilee la te in a kikhawm teng Sialsa tawh an-vakna nei uh hi.
Kanan Khua ah thuzuimi inn (100) val pha in mimalin zong mi tam mah mah ahih manin tha ki ngah mah mah hi.
Pawlpi Upa te khat in Jubilee la te tungah lungdamkoh na a gen na ah "hun khat lai-in ki thanem mah mah in upna picing zong ki neizo nailo in Pawl dangte bangin hong nak zol pha mah mah in Pawlpi bang abei phil dingin aki lamen hi mah ta leh tu a Jubilee la pa ahi Mark Tai Thio ii hanciamna leh Makaih siamna hang tawh Kua mah pawl dang ah tai lo in, Pawlpi sungah upna kip nei-in hici bangin a khangto thei ih hihi" ci-in lungdamna thu pulaak khia hi.
Jubilee ala te innkuan in mailam ah Pasian thupha a san semsem zawh nangun thu ngetsak ciat ni.