Receiving Religious Habit in the Little Way Sisters of St. Therese at Sts. Peter & Paul Church, Kalaymyo (1.10.2023)

စိန်ထ​ရေဇား သီလရှင်(၄)ပါးတို့၏ သင်္ကန်း​၀တ်ရုံခံယူပွဲ၊ စိန် ပီတာ နှင့် ​ပေါလ်း ဘုရား​ကျောင်း၊ က​လေးမြို့။
Tuni zingsang nai 8:00 am in Sts. Peter & Paul Biakinn ah St. Theresa Novice (4) te Nungak Siangtho suahpawi noptak in kibawl hi.
Tua sungah Kalay Diocese hongcing hongkem Bishop Felix Lian Khen Thang in Missa Biakpiakna hong makaih in Pasian kammal tawh kha-an vakna hong nei hi.
Amah in Pasian nasem dingin ki pumpiakna ii a thupitna te leh Pasian nasem suah theih nangin Nu leh Pa te ii a thupitna te limtekin hilhcianna hong nei hi.
Tua khitteh Nungak Siangtho a suak dingte amaute ii minam puantek uh silhin Pasian tau mai-ah hong pai uh hi.
A maute tungah Siadawpa leh Nungak Siangtho te ii a Siapinu Sr. Maria Van Nei Kim in Nungak Siangtho a suahnopna thu uh mipi mai-ah dotna nei-in amaute in Pasian mai, Siadawpa mai, a Siapinu uh ii mai leh mipite mai-ah Pasian aa dingin a ki piakkhiat nopna thu uh pulaak khia uh hi.
Tua khitteh Siadawpa in Nungak siangtho a suak dingte silhding puantual te thupha piakna nei-in, a man khitteh amaute tungah pia hi.
Tungsiah te phalna angah khituh teh amaute in a puantual thak te tawi kawmin Biakinn pua ah pusuak photin angeina puante uh suahkhia-in Puantual thak silhsa in Biakinn sung Pasiantau mai-ah hong pai kik uh hi.
Tua khiteh Pasian mai leh Pawlpi mai, Siadaw pa leh a Siapinu uh ii mai-ah angeina bangin St. Theresa Nungak Siangtho te zuihding thukhunte a zuih nangun kiciamna nei-in laibu sungah (sign) laisutna bawl uh hi.
Tua teng a man khitteh a Siapinu in St. Theresa Nungak Siangtho dingin nongteng kong sang hi. Tuni pan ki pan Nungak Siangtho a dang teng tawh a kibangin sepding leh ngahna ding tawh kisai-in akibang na hi-uh hi ci-in mipi mai-ah tangko na nei hi.
Tua khitteh Nungak Siangtho Suahpawi Puantual piakna a man hi-in Missa Biakpiakna pen a ngeina bangin ki zomsuak hi.
Missa Biakpiakna sungah Siadawpa leh Siampite (23), Deacon nih leh thuzuite tul (1200) kim kihel-in tua te sung pan Bawmaw Diocese pan hong pai Siampi (2) leh thuzuite, Hakha Diocese pan in zong Siampite cih bangin kihel thei uh a hih manun tha kingah mahmah hi.
Missa Man khit ciang St. Peter & Paul Parish Priest Fr. Maximian Mungpi makaihna tawh Parish mintawh pahtawina la sakna leh letsong piakna kinei-in tua khitteh Nungak Siangtho a suakthak teng tangin Sr. Dominica Cing Gel Mang in lungdamkoh thugenna nei hi.
Hun man ciang a kikhawm teng Aksa buhcim tawh anvakna ki nei-in tha kingah mahmah hi.
Siadawpa leh Siampi teng, VIP teng zong St. Theresa Mother House ah nitak-an vakna ki nei-in Pasian thupha tawh vai khempeuh nuam takin ki man siang hi.
Nungak Siangtho a suakthak teng pen
1. Sr. Cecilia Bawk Ra (Paan Khat Parish, Bamaw Diocese)
2. Sr. Maria Vung Sian Man (Vangteh Parish)
3. Sr. Dominica Cing Gel Mang (Laaitui Parish)
4. Sr. Elizabeth Vung Lawh San (Mualpi Parish) cih te ahi uh hi.
Amau te aa dingin thu ngetsak ciat ni.