Preparation for Synod of Bishops

(2021-2023) Kikal sung Leitungbup Siadawpite thu kikupna dingin Diocese kim pan kiginkholhna a ki bawl na pen Kalay Diocese sung ah tuni- in Ingyinkhone Parish pan ki pan khia hi.
Hih thu kikupna sungah Vatican zumpi panin a hong pai lai tawh kituak in a makaih dingin Kalay Diocese hong cing hong kem Bishop Felix ii a teel Rev. Fr. Damian Zam Sian Dal in makaih in Siadaw huanga Zum nasemte, Deacon te, Brother te leh Sister te tawh Kawlpi pan Ingyinkhone Parish ah pai-in zing sang nai (8:00AM) in hun kipan thei hi.
Hih thu kikupna sungah Parish sunga Siate, Nupi, Papi, Khangno, Numei Pasal, Kipawl na tuamtuam pan makai teng, Parish Sunga om khua kim pan Panmun len teng cih bangin kihel in mi vekpi (80) kim pha hi.
Hunzatna- Sia te makaihna tawh kipat thungetna leh lasakna a man khitteh Deacon te makaihna tawh Kha Siangtho Pasian Sapna thungetna ki nei hi. Tua khitteh Rev. Fr. Joseph Zo Mung Makaihna tawh Lai Siangtho Simna leh Pasian Kammal lungngaihna (hilhcian na), Rev. Fr. Damian Dal Makaihna tawh Synod tawh kisai hilhcian na leh thu kikup ding zia te hilhcian na nei in tua khitteh (Group) khen in thu kikupna leh (Form) dotna leh dawn na te Deacon te leh Sister te, Zum nasem te makaihna tawh ki bawl hi.
Thu kikupna, (Form) lai-atna teng a man khitteh tawp khak thungetna leh Siampite thupha piakna tawh hunte ki man siang hi.
Inntek Siampipa Rev. Fr. Andrew Thang Ngaih vaihawm siamna tawh Ingyinkhone Parish in a pai te (thu kikum teng) vok limci mah mah khat hongngawh a hih manin sun an nekkhopna zong om in a pai tengin nuamsa in thu kikupna te tungtawn in zong thangah uh a hih manun cidam lungnuam leh lawpna tak tawh sunan nek khitteh inn lam zuan ciat uh hi.
Parish Priest te lem hun hun in Kalay Zone sunga om Parish te ah ki bawl masa ding hi. Tua khitteh Khampat Zone cih bangin a banban in ki bawl ding hi. Hih thu kikupnate tungtawn in ih Pawlpi sungah Khasiangtho lamlahna tawh khantohna tampi a om nangin thungen ciat ni.
By- Fr.Joseph Zo Mung (Director of OSC & RVA Tedim, Kalay Diocese)