Pope Francis in Lai Siangtho siam Cardinal Albert Vanhoye sihna hangin khasia

Cardinal Albert Vanhoye

Pope Francis in Lai Siangtho siam Cardinal Albert Vanhoye sihna hangin khasia

Pope Francis in July 29, 2021 ni aa hong nusia ahi, kum (98) apha Piantit Cardinal Albert Vanhoye hong nusiatna hangin zahtakna lai abeisa ni-ngani (July 29) ni-in khak hi.

Pope Francis lai khakna sungah Cardinal pa in Lai Siangtho tawh kisai in ‘a siam mahmah Lai Siangtho pilna’ ci-in pahtawina pia hi. Amah pen Cardinal te sungpan akum tam pen ahi hi. Pope pa’ laikhakna sungah ‘Cardinal pa hong nusia cih thu kazakna hangin note tawh hita leh Jesuit congregation te khempeuh tawh hita leh, Cardinal innkuante tawh hita leh, Cardinalpa a thei te leh a it te khempeuh tawh hita leh no te khempeuh tawh a kibangin ka khasia hi cih thu leh Pasian tung leh Pawlpi tungah itna takpi tawh akipiakhia/ na asem Cardinalpa adingin zong thu ka ngetsak ding hi. Ama ii thalawptak aa anasepna te hangin zong ka lungdam mahmah hi. Amah in lai hilh zong asiam mahmah, a kician mahmah, mi khempeuh ii azahtak Lai Siangtho sang ukpi khat zong hi-in, Pope zumpi (Roman Curia) ah zong  na asem khat hi. Tua banah amah in lai hilh siam bek hilo in thugen siam, mite lamlakna ah Lai Siangtho sungah lungsim nga-in anungtasak nuam khat hi” ci-in pahtawi na pia hi.

Cardinalpa in Piantit gam, Hazebrouck ah 1923 July 24 ni-in suak hi. 1941 kum, a ma kum (18) aphak hunin Jesuit congregation ah lut dingin Le Vignau ah pai hi. Tua pan Enghien khuapi ah Philosophy leh Theology sinin 1954 kum, July 26 ni-in Siampi suak hi.

1956 kumin Lai Siangtho sin dingin Roma ah sawlna ngah aa, Lai Siangtho sang (Biblicum) pan Doctor buaih ngah hi. 1959 kumin ama sang kahna Biblicum ah Professor dingin teelna ngah hi. 2006 kumin Pope Benedict XVI in Cardinal dingin teel hi. Kum (80) aval khit ciangin Cardinal ateelna in Pawlpi adingin akipiak khiat luatna, a thumanna, a etteh huai ama kipiak khiatna hang hi ci-in Pope Benedict in gen hi.

Vatican ii news ahi L’Osservatore Romano ii adotna ah Cardinal pa in “Hebrew Lai khakin Topa Jesu ii Siampi hihna tel takin hong lak ahi, khat bek aom laikhak hi” ci-in dawng kik ngei hi. Lai Siangtho at pa in Topa Jesu ii Siampi hihna alahna ah ‘archiere’us’ cih kammal zang hi. A deihna in “priest-head” Siampi lutang cih nopna hi. Hih kammal in Topa Jesu sung a om Siampi hihna pen kicing takin hong lak hi. Topa Jesu in Pasian leh mihingte kikal ah hong ki gawmsak hi. Cardinalpa kivuina hun pen Cardinal Leonardo Sandri makai in St. Peter biakinn pi ah July 31 ni, zingsang nai 11:00 in bawl uh hi. Cardinalpa sihna hangin tu laitak adamlai Cardinal (220) om lai aa, tua te sung pan Pope ki teelna ah mee apia thei Cardinal (123) bek om ta hi.

https://bit.ly/3xfBBdn

Add new comment

1 + 4 =