Phaitu Khua Jesu Siangtho Lungtang Biakinn Thak Hon Pawi (15-17.4.2023)

Rev. Fr. Titus En Za Khan (PP of Tonzang), Rev. Fr. Job Aung San (Associate PP of Tonzang) len Rev. Fr. Andrew Cin Go Lian (Phaitu Tualsuak Siampi) te kipawl khawmin Tonzang Parish uk sung Phaitu Khua ah Siangtho Lungtang Biakinn hon pawi (15-17.4.2023) ni sungtengin nasia takin bawl uh hi.
Vaidawn ni-in Tonu Suangbuk leh Pawlpi tunzawh kum (75) cinna Diamond Jubilee Mualsuang te thupha piakna ki nei hi. Tonu Suangbuk zong a thak hi-in hoih mahmah hi.
Biakinn pen kum (10) sung bang a ki lam hi-in hoih mahmah hi. A zaina- pi (37), a sauna pi - (110), a sanna pi-(80) cih bang hi-in etlawm mahmah hi.
Phaitu khua ah khuazangin inn (204), RCM Thuzuimi inn (74) leh mimal (420) pha in tua mun ah hi bangin Biakinn hoih lamzawh pen thuzui mite upna picing mahmah hi cih ki mu khia hi.
Zintun ni leh nipi nitak lenkhopna nasia takin ki bawl thei in khua hun zong hoih a hih manin nuam mahmah hi.
Hih Pawi Missa Biakpiakna sungah Siadawpa leh Siampite vekpi gawm (11) leh Nungak Siangtho (17) pha-in Phaitu khua ah Siampite leh Nungak Siangtho te a tampen ni hi ci-in ki ciamteh hi.
Pawisim in khual pan a pai mi (500) val pha-in Khuasung mi teng leh a nileh in a pai teng tawh mi vekpi tul val pha in nop mahmah hi.
Pawi sungin Sial gawh ding (10) a kigin lak pan mipi upmawh sang tawmzaw a hih manin (6) bek ki go hi ci-in inntek Sia pa Andrew Hau Za En in pulaak khiatna nei hi.
Sial bek thamlo in Bawng, Vok leh Ak zong kicing tak in go uh ahih manin Pawisimte in nuam sa mahmah uh hi.
Pawisim in a pai Siampite leh Nungak Siangtho teng zong Pawi puan leh letsong tuam tuam te a piak banah Saphelh Bakgolpi khat tek zong pia lia ahih manun thu zuite pen inn tawm na tawh ki tuakin a hanciam na uh etteh huai mahmah hi.
Tui hamsat laitak ahih manin tui pen khua sungah ki cinglo hi mah ta leh mundang pan Mawtaw tawh nawn uh ahih manun zat khop ding kingah veve hi.
Biakinn lam ding, Pawi bawl ding cih pen baihlo hi mah ta leh hamsatna tampi kawmlal pan Pasian aa ding nambat khat in koihin a hanciam inntek Siampite leh thuzui mite tungah ih Biak Pasian in matutna gualzawhna pia hi cih pen tu sunga ih pawi bawl te tung tawnin ki mu thei hi.
Ih upna tungtawn in Pasian ih muanngamna zahzah in Pasian in eite tungah sep zawhna tha hong pia ding hi cih phawkin bang hun bang hun hi ta leh ih sep zawh zah ciatin hanciam leng Topan hong panpih hi cih phawkin hi bangin na hoih sepnate ah hanciam semsem ni.
By- Fr. Joseph Zo Mung