Papi te Pasian Thu Sinna leh Thuhilhsia te Pahtawina (12-15.10.2023)

Phai, Jesu Siangtho lungtang Parish ah Parish bup in Papi te Pasian thu sinna pen Oct 12 pan 14 dong ni thum sung noptak in kibawl thei hi.
Tua Sungah 1. Fr. Robert Kam Khaw Hau 2. Fr. Damian Zam Sian Dal 3. Fr. Joseph Thang Nen Zo Mung leh 4. Deacon Nang Deih pau te in tintak piakna nei-in Papi te (150) kim kihel thei uh hi.
Tintan man khit Oct 15, 2023 nipini in Parish mintawh Thuhilhsia te Pahtawina ki nei hi. Phai Parish sung ah Thuhilhsia (9) a om lak pan khat pen damlohna hang tawh kihel thei lo hi.
Missa Biakpiakna a man khit teh Sia te Pahtawina ah inntek Siampipa Fr. Damian Dal in thu gen na leh Sia te latt Saung piakna nei masa hi tua khit teh Parish min, Papi kipawlna, Nupi te, Khangno te, Naupang te cih bangin kipawlna tuamtuam min tawh Khua kim panin a banban in ki pia hi. Tua khitteh mimal min tawh piakna kinei hi.
Ih Diocese in zong Parish kim ah Thuhilhsia te Pahtawi na pen Kum khat in a tawm pen khat vei bawl hamtang ding leh St. Luke pawi ni a hih kei leh Mission Sunday ni-in bawl dingin tha piakna nei hi.
Ih Pawlpi khantoh na dingin Thuhilhsia te pahtawi siamin a maute aa ding thu ngetsak ciat ni.