Monthly Recollection of Priests of Kalay Zone (16.9.2023)

Monthly Recollection of Priests of Kalay Zone

Tuni Kalay Zone a om Siampite Pasian thu lungngaihna pen a ngeina mah bangin zingsang nai (9:00) in Office Reading tawh ki pan hi. Office Reading pen Fr. Anthony Hem Kho Sei leh Fr. Damian Dal te in hong makaih uh hi.
Tua khitteh Pasian thu lungngaihna pen Fr. Francis Thang Za Sing in hong makaih hi. Amah in " How to control our negative emotion" cih thulu tawh ih lungsim sung pan ahong piangkhia ngaihsutna hoihlote tungtawnin thusia ih bawlkhak loh nadingin ih lungsim bangci bangin kemcing ding cih thulu tawh gen khiatna hong nei hi.
Tua banah အမြင်မတူရင် ဘက်​ပြောင်းပြီးမှ ကြည့်ရမယ် cih laigelhsiam khat ii kammal bulphuhin muh dan a ki batlohna munte ah kitelsiamna a om theih nadingin ih etna mun te ih laih ding akisapna thu te zong gen khia hi.

Tua khitteh ama ii sangkahna South Korea gam aa a tuahkhak amuh khak thu te hong hawmsawn hi. Ama gen na ah South Korea gamah sangnaupang khat aa dingin bang ngimna tawh sang kah, Siampi na suah khit ciang bang sem nuam cih thu te ki thupi sak mahmah in Siampi a suah khituh ciangin zong amaute ii ukna leh kivakna mun ciat uh ah vaipuak (posting) kipia uh ahih manun mikim in lawptakin na sem thei in a khangto ahih na thu te uh zong ei kiangah etteh theih dingin hong gen hi.
A tawpna ah (Paunak 19:16)
"Thukham a zuite in a nuntakna a kem hi a, thukham a thudonlote si ding hi" cih Laisiangtho tawh thu khupna hong nei hi.
Tua khitteh daitakin Pasian thu lungngaihna, Private in thunget hun leh mawhsutna te kinei hi. Mawhsutna hun man khit ciangin Fr. Paul Pau Kim Tuang makaihna tawh lasakna leh Khi (50) khinkhopna te ki nei hi.
Tua khitteh Deacon Francis Nang Deih Pau makaihna tawh Siampite ii sun hun thungetna te ngetkhopna tawh Pasian thu lungngaihna hun ki man siang hi. Hih Pasian thu lungngaihna sungah a cidamlo Fr. Peter Thawng Mung leh Yangon ah Zato a kilak Fr. Paul Langh Muan Lian tenih lo teng kihelkim thei uh hi.
Hun man ciang thu zaksakna ah Fr. Maximian Pau Sian Mung in lungdamkohna leh maikha aa ding seh kholhna, Fr. Joseph Kap Tung Nung in Thuhilhsia te Pasian thu lungngaihna neih ding vai leh Han puah ding vai gen na, Fr. Raphael Suang Cin Khup in Fr. Paul Muan Lian aa ding thungetsak ding a kisapna, huhna piakna tawh kisai leh Sep 28 ni ciang Hakha leh Kalay Diocese kipawlin Nation Building tawh kisai Workshop bawl khop ding thu te gen na leh Fr. Joseph Pau Lian Kham tung pan Parish Siampite phalna letmat tawh amah kiangah a pai te Oxygen free in thunsak ding cih thu te gen khiatna nei hi.
Tua khitteh Fr. Robert Kam Khaw Hau in ama Misiangtho Robert pawi ni-in Siadawpa leh Siampite ama kiang a pai kim nangun sapna nei hi.

Add new comment

10 + 1 =