Monthly Recollection of Priests of Kalay Zone (12.8.2023)

Kalay Zone aa om Siampite in khakhatjn khat vei ta a bawl uh Pasian thu lungngaihna pen tuni-in Diocesan Pastoral Centre, Kalaymyo ah bawl uh hi.

Tua sungah Siampite thungetna "Office Reading" pen Rev. Fr. Paul Pau Kim Tuang in hong makaih in tua khitteh Pasian thu lungngaihna pen Rev. Fr. Joseph Laang Sian Mung in hong makaih hi.

Amah in (Mt 16:24) "Mikhat peuh in ka nung hong zuih nop leh ama deihna nialin ama singlamteh pua in ka nung hong zuita hen" cih Laisiangtho bulphuhin ih nuntakna te ah mannei takin ih nuntak theih nangin hilhcianna hong nei hi.

Ama genna ah "ih manneihna (value) pen ih lungtang sungbek ah om in gentheih haksatna ih tuak ciang ih mawhnadaan loh nang, mikhat peuh ii hamphatnang in ngaih sun in thuaksiam leng tua in man hong nei ding hi. Topan Jesu in ka nung hong zui un a cih ciangin gimna a thuak dingin hong sam ahi hi.

Nisim in ihsepihbawl, ih thuak gimna te khempeuh pen ih Singlamteh a hih manin Nisim in ih puak singlamteh tungah Christu a om ciang bekin ih puak singlamteh in man hongnei pan ding hi.

(Rom 12:17) na sungah "Hoihlohna pen hoihlohna mah tawh kuamah na thuk kik kei un. Mi khempeuh’ mai-ah a kilawm dingin na gamta un" a cih mah bangin ih nuntakna te ah mannei takin nungta in ih sunga om Topa Jesu pen mite tungah hawmsawn ni" ci-in thapiakna hong nei hi.

Tua khitteh Mawhsutna leh Pasian thu lungngaihna hun nai khat sung ki nei-in khi (50) vei khinna tawh kizom suak hi.

11:30 AM panin Deacon Nang Deih Pau makaihna tawh (Midday Prayer) sun hun thungetna kinei -in thunget man ciang thu zaksakna ki nei hi.

Thu zaksakna ah Rev. Fr. Maximian Pau Sian Mung (Chancellor) in maikha cianga ding tawh kisai zaksakna a neih khitteh Rev. Fr. Robert Pau Gin Mung (Minor Rector) in Assumption of the Blessed Virgin Mary pawi-in August 15 ni-in Sang pawi bawl ding leh Minor Sang kum (25) cinna Jubilee Mualsuang phuh ding tawh kisai genkhiatna nei hi.

Kalay Zone a om Siampite sung pan tu laitak nih khualzin in Rev. Fr. Peter Thawng Mung pen damlohna hang tawh hong kihel zolo hi. Tua lo a dang teng hih Pasian thulungngaihna ah kihel kim thei uh hi.