Monthly Recollection of Priests of Kalay Zone (12.11.2022)

Monthly Recollection of Priests of Kalay Zone

Tuni Kalay Zone sunga om Siampite Pasianthu lungngaihna pen Kalay Diocesan Pastoral Centre, Kalaymyo ah noptakin ki bawl hi.

Tua sungah zingsang thungetna ngeina teng leh (Office Reading) pen Rev. Fr. Raphael Suang Cin Khup leh Rev. Fr. Robert Kam Khaw Hau te in hong makaih in tua khitteh Rev. Fr. Joseph Thang Nen Zo Mung in Kha-an vakna hong nei hi.

Rev. Fr. Joseph Zo Mung in American Roman Catholic Modern Theologian William T. Cavanaugh ii laigelh Political Theology and Christian Ethics cih laibu bulphuh in Gam le Lei khantohna dingin Roman Catholic Pawlpite in tavuan vaipuak aneihna thu, Gamsung ki ukna te tawh kisai-in Catholic Pawipi ii thuneihna, Pawlpi in bang vaipuak nei hiam cih tawh kisai-in hilhcianna hong nei hi.

Amah in nidang lai hun bangin gamsung ki-ukna tawh kisai-in Pawlpi in (Tutmun) Tavuan vaipuak neilo hi. Ahi zongin Pasian deihna tawh a kilehbulh ki-ukna, (Human Dignity) Mihing te ii nuntakna a kithupi sak lohna mun, Thu manthutak tawh ki-ukna a om lohna mun te, (Faith & Moral) tawh a ki lehbulh gamtatna (ki-ukna) munte ah Pawlpi in lampi man hilh ding tavuan vaipuak nei hi cih thu te gen khia hi.

Pawlpi ii tavuan vaipuak ih cih pen nisim in ih sep den Mission nasep te bek hi lo-in, thumaan thutak in gualzawhna angah na dingin (the voice of voiceless) nenniamna athuak mite in midangte tawh a kibangin khantohna a ngah theih nang lampi honsak ding tawh kisai-in tavuan vaipuak nei ahihna thu te leh mipite ii haksatna, thumna, kahna te pen Pawlpi tawh kisai hi, kei mah mah tawh kisai hi ci-in ngaihsut ding akisapna thute Pawlpi ii hong hilh thukhunte bulphuh in gen khiatna hong nei hi.

Tua banah hih Pawlpi ii tavuan vaipuak ih cih te pen a diakdiakin (Bishop) Siadawte leh Siampi (Topa) te ii hih ding ahih manin eite in ih sep ding tavuan vaipuak te ih sem zo takpi hiam cih thu te ei leh ei ih kisittel ding a kisapna thu te a gen kawmin Misiangtho Paul in (Rom 7:15) na sungah ka hih nopteng ka hih kha kei a ka hih noploh teng ka hih kha zaw hi a cih mah bangin ih sep ding teng semlo in ih sep loh ding teng a sem zaw ih hi hiam cih zong ei leh ei ki sit tel in sep ding a kilawmte ih sep zawh nang hanciam ni ci-in thapiakna nei hi.

A tawpna ah Pope Francis ii tu kum sung, a khual zinnate ah a bulphuhpi a hi Be sensitive in listening to the cry of the poor and the Earth ci-in mizawngte kahna aw lungduai takin ih ngaihsak zawh nading leh ih Myanmar gam sungah Pasian deihna tawh kituakin ki-ukna maan a manlangin ih ngah zawh nang ih hih theih bangciatin hanciam in ih tavuan vaipuak ciat limtakin ih sep zawh nang a kisam thupha te ih Biak Topa Pasian tungah ngen khawm ni ci-in thukhupna nei hi.

Thu genna a man khitteh Mawhsutna leh Pasian thu lungngaihna hun minute (45) sung bang nei-in tua khitteh Rev. Fr. Andrew Thang Ngaih Lian ii makaihna tawh Khi (50) khin na kinei-in, Khikhinna a man khitteh (Midday Prayer) sun thungetna teng ngetna tawh Pasian thu lungngaihna hun ki man siang hi.

Hun man khit ciangin Rev. Fr. Maxiamian Pau Sian Mung (Chancellor) in Lungdam kohna leh Mai Kha sunga ding hungelna te gen khiatna hong nei hi. Tua khitteh Rev. Paul Langh Muan Lian (Fiat Director) in maikum aa ding Pawlpi Calendar te kingah khinta- ki lei thei ta cih lungdamna thu hong tangko hi.

Tua banah Msgr. John Deng Cin Khup (PP of St. Marys Cathedral) in December kha ni (3) ni ciangin St. Mary Cathedral ah Jesuits Deacon (3) in Siampi suahna za ngah ding cih thu hong tangko khia hi.

Rev. Fr. Damian Zam Sian Dal (PP of Sacred Heart Phai) in Biakpiakna sunga zat ding Liturgy tawh kisai (Adventus leh Christmas) hun sung tengin zat pak theih ding pen ei kam Zolai tawh thoh nuam ahih manin Liturgical Commission vaipuak anei Siampite in Siadawpa kiang pan phalna lai a ngetsak na dingin genkhiatna nei hi.

Tua khitteh Rev. Fr. Raphael Suang Cin Khup (Procurator) in Siadawpa pen tu laitakin Cikha Parish ah Confirmation pia dingin pai a hihna thu leh maikal nipizawh ni nihni in hong tung kik ding cih thu te a kipan Siadaw huang ah Transformer a thak (310 W) kithuah khinta ahih manin mei ta hawmthawh om nawi lo hi cih lungdamna thu hong pulaak khia hi.

Rev. Fr. Robert Pau Gin Mung (Rector of Minor Seminary) in Seminary Commission te ii thu kikupna leh khen satna te hong gen khia in tua sungah Brother te tawh kisai-in Major Seminary pan Professor te ii Report tawh ki zui-in khensatna nei ding, maikum ciang Minor Sang alut nuam tan (10) Aungsa te (Entrance) phi sak phot ding cih thu leh a Parish Priest te kiangah a tawm pen kha (6) sung om phot ding cih thute hong gen hi. Tua banah Minor Sang ii kum (25) a cinna Silver Jubilee pawi pi pen December Kha ni (5) ni-in Minor Sangah ki bawl ding hi cih thu leh tua ni-in Brother (6) in Deacon suahna za ngah dinghi cih lungdamna thu hong pulaak hi.

A tawpna ah Rev. Fr. Joseph Kap Tung Nung (VF of Kalay Zone) in Kalay Zone aa om thuhilhsia te ii Pasianthu sinna (Ongoing Formation) ki man khin a hihna thu leh tua thusinna sungah thuhilhsia vekpi gawm (46) a om lak pan (44) kihel thei hi cih thu hong gen khia hi.

Tu laitak Siadawpa leh Kalay Zone sunga om Siampite a vekpi in dam kim ciat in hih Pasian thu lungngaihna sungah zong khualzinna anei te lobuang a vekpi in kihel kim thei a hih manin lungdam huai leh thangah huai mahmah hi.

Add new comment

1 + 0 =