Monthly Recollection of Diocesan Staff Members (26.1.2024)

Tuni Kalay Diocese sung aa om Zum na sem te in a ngeina mah bangin Diocesan Pastoral Centre ah Pasian thu lungngaihna nei uh hi.
Tua sungah Pasian thu lungngaihna pen Rev. Fr. Joseph Laang Sian Mung in makaih in kha-an vakna nei hi. Amah in January Kha cih min ii a khiatna thu kitel takin a gen khitteh kum thak tawh thak suah khawm ding, kum lui hun sungin ih om zia te ngaih sun in tua te tung tawnin ki phuahpha in kum thak, lametna thak tawh mainawt in kalsuan ding ci-in thapiak na nei hi.
Tua banah (Koinonia) Kipumkhatna cih kammal ii a thupitna te leh tu 2024 kum pen ih Diocese in ki pumkhatna kum in a ciaptehna thu zong gen khia hi. Ki pumkhatna a om loh manin ih gam sungah ih tuahkhak buaina te phawkin ki puahphat zia ding leh Pasian leh mihing, mihing leh mihing, singkung lopa te leh ganhing te tawh kilem takin nuntak zia ding te zong gen khia hi.
Tua banah eite ih picin manin Pasian in Diocese sungah nasem dingin a hong teel hilo in Pasianin eite hong teel ahih manin picin na hongpia ding hi ci-in upna neih ding leh upna tawh thu nget ding zia David i galzawhna tawh gentehin thapiakna nei hi.
Mawhsutna, Pasian thu lungngaihna, Personal Reflection, khikhinna leh Missa Biakpiakna te a ngeina mah bangin ki zom suak in Missa Biakpiakna pen Rev. Fr. John Pau Sian Thang leh Rev. Fr. Andrew Go Khan Nang te in makaih uh hi.
Sun nai sawmlenih teh sun-an nekna tawh Pasian thu lungngaihna nuam takin ki man siang hi.