Mi Siangtho Benedict Pawi Mainuai ah ki bawl

Misiangtho Benedict minpua Mainuai aa om Benedictine Sister te Pawini

Mi Siangtho Benedict ii pawi ni pen Kalay Diocese hong cing hong kem Bishop Felix ii man hun tawh kituak in Misiangtho Benedict minpua Mainuai aa om Benedictine Sister te in July 12, 2020 ni-in nasia takin bawl uh hi. Hih pawi bawlna sungah Missa Biakpiakna leh Pasian thu tangkona te Bishop Felix in hong makaih in tua sungah Siampilian (1), Siampi (5), Nungak Siangtho (11), Tangval Siangtho (1), Thuhilh Sia (1) leh thuzui mi (12) ki hel thei uh hi.

Siampilian pa in Pasian thu a tangko na sungah Misiangtho Benedict ii tangthu tawm khat a gen khitteh (Mt. 4:4) na bulphuh in “Leitung mite in an leh tui bek tawh a nungta hi lo in Pasian kam pan hong pusuak khia Pasian kammal (thu) tawh a nungta hi” ci-in ih nuntakna te ah Pasian kammal mun ih piak na ding leh Pasian thu tawh ih nuntak na ding zia te kitel takin hong gen in tha ki ngah mah mah hi.

Kikhop khit ciangin a kikhawm teng Benedictine Sister te in Sunan hong vak uh hi. An nek kawmin amaute ii Pawi ni pen Siampilian pa leh Siampi te tawh Kawlgam a hong tun zawh uh a bawl cil na uh a hih manun lungdam kohna thu te hong gen uh hi. Sun an nek khit ciangin hih Benedictine Sister (3) tengin Siampilian pa leh Siampi te tung pan thupha san na a tuam vilvel in nei lai uh hi. Tua khitteh Siampilian pa leh a pawl te Kawlpi ah lungnuam takin ciah kik uh hi.

Hih St. Benedictine Sister te ii a phungpi pen India gam ah om in a maute ii Convent pen Kawlgam sung ah hih Mainuai bek mah ah om uh hi. Tu laitak hih Mainuai ah Benedictine Sister te (3) om in amaute ii om na Sanginn pen Mangkam in (Monastery) ki ci hi. Amau te ii nasep bulpi (Charism) pen (Contemplative) ci-in, mi tawh a ki gamlatna gamsung ah, om in tua mun pan Pasian tawh kizom in thuzui mite aa ding (Pawlpi) khantohna dingin thungetsak na leh Pasianthu lungngaihna bawl den na, cih te a hi uh hi.

Amau te pen Mangkam in (Female Monastic or Monastic Nun) kici-in Kawlkam in (ရေသ့မ) kici uh hi. Pawlpi sungah (Monastic Monk and Nun) ci-in numei leh pasal om uh hangin ei kiangah tu laitak in numei bek om uh hi. Hi bangin ih Pawlpi sungah Pasian aa dingin a ki pumpiak (Monastic Monk and Nun) te a om manin ih Pawlpi sungah khantohna tampi om hi cih thu te Pawlpi tangthu te sung pan ih thei hi. Hih Mainuai aa om St. Benedictine Sister te in zong amuate ii Charism tawh kizui-in ih Diocese sungah na hoih tampi a hongsep zawh nangun thungetsak ciat ni.
Fr. Joseph Zo Mung (KOSC & RVA Director)
#Benedict#monaster#feastday,

Add new comment

13 + 2 =