Meiphelh khat hihna pan Catholic Siampi khat suahna (Or) Alamdang Pasian sapna

Ama min pen Tom Colucci hi a, 2001 kum, September 11 ni dong meiphelh nasep a sem khat ahi hi. Ahi zongin 2001, Sep 11 ni-in ama nuntakna kikhel sak hi. Tua ni pen American gam leh gammi te adingin mangngilh zawhlohni, alungtang uh anat mahmah nikhat ahi hi. Ama adingin zong mangngilh zawhloh thu khat ahi hi.
Tua ni ciang dong amah in New York ii meiphelh zum ah zum uk khat ahi hi. Tua ni-in mei kangin Leisek innpi te cim ziahziah a, a nasep pih alawmte tua mei phelh dingin a buai mahmah na uh ama mik mahmah tawh mu hi. Mithat mihaite ii mihing lungsim neilo in mei ahalna uh hangin meiphelh mi tampi ii luanghawm te aki koih zihziah pen aman mu hi. Amaute’ kha lam makaih Siampi Fr. Mychal Judge in zong meiphelhte Sathau siangtho piain Pawlpi ngeina bangin abawlsak kawmin meithemte ama tungah kia-in tua lai ah amah zong a sih na te Tom Colucci in mu hi.
Tua bangin amuh laitak, ama lungsim ngaihsutna sungah a suak thu in ‘Pasian koi lai-ah om ahi hiam?’cih ahi hi. “Tua ni-in mihing nuntakna ii siatna pi ka mu kha hi. Pasal, numeite, naupangte in tua lai-ah gentheih haksatna athuak mite amau hih theih bangin honkhia uh hi. Bang hang hiam cih leh amaute in Topa Jesu ii a thuthuk pumpi te ahi uh hi. Amaute gimthuakna te ko te in zong ka thuakpih uh hi. Pasian koi mah ah pai lo hi. Tua lai-ah ko te tawh om khawm hi” ci-in gen hi. Tua thupiang sung pan angah khuavak hangin aman Catholic Siampi khat suak nadingin khentat hi.
Tua 2001, September 11 ni-in America gam bek hi lo-in leitung khempeuh lungkhamna apia Twin Towers migilo te in Vanleng tawh bom khia in asuksiatni hi a, a khasiathuai mahmah nikhat ahi hi. Tua ni-in tu in kum (10) pha ta hi. Tua ni-in amah mah in mite honin, tua mei phelhna ah ama nuntakna nangawn itsik lo-in aki piakhia meiphelh pa khatin tu-in ama nuntakna khempeuh mihingte ii pumpi leh kha hotkhiat nadingin aki piakhia Catholic Siampi Tom Colucci hong suak ta hi.