Mass Celebration on the (30th) Priestly Ordination Anniversary of Msgr. John Deng Cin Khup, V.G & Rector of St. Mary's Cathedral, Kalaymyo (21.3.2023)

Tuni Zingsang nai (6:30) in Msgr. John Khuppu ii Siampi suah zawh kum (30) cin lungdam kohna Missa Biakpiakna St. Mary Biakinnpi ah noptakin ki bawl hi.
Msgr. Khuppu in Missa Biakpiakna sungah kum (30) sung angahsa thupha te tung lungdam akoh kawmin, a neu tuunga kipan Pasian nasem Siampi a suaknuam mikhat ahih na thu leh ei ut thu tawh Siampi a ki suak thei hilo in Pasian in a hong teel manin a ki suak thei bek hi cih thu a gen kawmin ama ii a neu lai pan ki pan atuah khak thute a ban ban in gen khiatna nei hi.
A mah leh Rev. Fr. Philip En Mang in tuman kum (30) lai-in Hakha myo ah Siampi suahna a ngah khawm a hihna thu, Kalaymyo pan Hakha a pai nading Mawtaw ngahlo dektak ahihna thu, Hakha Diocese ngahtawh kituak ahih manin Siadawte leh Siampite pawl cingin Anhuanbuk nangawn ah kilum kha ahih manin a lungdamna thu, huihleguah kinuai na hang tawh Siampi suah pawi lang Stage tungah ki bawlin a lang Biakinn sungah ki bawl ahihna thu te mitkha aa muh theih dingin thangah takin hong gen khia hi.
A mahin a haksatna ih tuak ciangin Pasian thupha kingah semsem hi ci-in Siampite tha apiak kawmin Pasian in Abraham tungah a kam ciam ahi (Gen 12:3) "Nang thupha ahongpia te thupha ka pia dinga, nang hong phuisam te ka phuisam ding hi" a cih kammal bulphuhin Pasian teelsa Siampite a it te in thupha ngah semsem ding hi ci-in tuni-in amah tungah itna a lak thuzui mite tungah thapiakna nei hi.
Missa Biakpiakna a manin khit ciangin Associate Parish Priest Rev. Fr. Francis Thang Za Sing makaih Pahtawina hun khat nasia takin bawl uh hi.