Maitaina in lunggim mikhat ii nikhat sung khiatna neisak zo

Pope Francis

Pope Francis in November (5) ni-in, Rome a om, Catholic Sangpi ah pai-in, tua sanghuang sunga om Topa Jesu Siangtho Lungtang kiangah a ki-ap Zatopi aki phutzawh kum (60) cin pawi, Missa biakpiakna ah kihel hi.
Tua lai-ah Pope in thugen a, “Tu ni pen Siangtho Lungtang zahtak ni ahi, Kha ii ni-nga ni masa ahihman in kammal thum konggen nuam hi. Tua te in-phawkna, Natna satna leh Hehnepna ahi hi.”
1. Phawkna
“Phawkna cih ciangin lungsim takpi tawh abeisa thu te etkikna khat ahi hi. Topa Jesu’ lungtang in ama ii nuntakna piakkhiatna lim honglak hi. Topa Jesu ii lungtang in hehpihna lim khat hi-in, Pasian in a thupha te itna tawh a khongin hong piak pen ih phawk theih nading zong ahi hi. Tuhun leitung in lungkham dahna te tawh kidim in om hi. Hi bang hunah Pasian hehpihna te ih muhtheih ding kisam hi. Na lungtang tawh khat vei en dih in. Na phawk khat a om kei leh azung om lo hi ding hi. Azung a om kei leh akhanding baihlo ding hi. Tua ahihman in nang tungah itna hongpia, hongvaan, hongtawisang te phawk kik in” ci-in Pope in gen hi.

Tua banah Pope in tua Zato ah a kibawl lai-in a khoi, a bawl mite khempeuh tungah lungdam ko hi. “Leitung bup gentheih haksatna tawh akidim hibang hunin ih khasiat mahmah hunte phawk kik ding ki sam hi. Tua bang phawkkikna in ei leh ei lunggimna ding hi lo-in, tua bang thupiangte sung pan hoihtak in ih teelsiam nading ahi hi. Nuntakna ah, ih lungtang hong sukha nakhat peuhpeuh ahizongin, mi khat peuhpeuh ahi zongin ih phawk ciat hi. Topa Jesu Lungtang in abeisa a ihthuak ih liammate hong damsak ding hi. Bang bang apiang zongin Pasian in eite hong itna mangngilh ding hilo hi. Tua ahih manin abeisa hunte phawktheihna lungsim na nei un” ci-in Pope in hanthawn hi.

2. A nasia mahmah natna
Jesu Siangtho Lungtangin zahtakna khat bek hi lo hi. A nasia mahmah natna te alak Pasian thu zuihna khat zong ahi hi. Itna hangin liamma te ngahin Singlamteh tungah honglak lungtang khat ahi hi. Pasian lungtangin natna ii phungpi khat hi a, mihingte adingin nasia takin kuangin om hi. Pasian ih it takpi leh mite adingin zong ih thuak zawh ding kisam hi. Adiak diakin amaute’ natna satna te ih thuakpih ding ki sam hi. Liamma leh natna a thuak mite ih huh ciangin eite in zong hehnepna ih ngah dinga, ih lungnuam ding hi. Liamma om lungtangin kicing hi. Kam tampi pau ding kisam nawnlo hi” ci-in Pope in gen hi.

3. Hehnepna
“A thumna kammal in hehnepna ahi hi. Hehnepna in mihingte kiang pan hong pai thahatna hi lo hi. Mihingte tawh a om khawm Pasian kiang pan hong pai Thahatna khat ahi hi. Pasian lungtang itna in gentheihna, tawlnate pan hehnepna leh thakhauhna hong pia hi. Natna gilo te tawh ih ki tuak hunin eite ii bangmah ih hih zawh lohna ih thei semsem hi. Koi pan bang ci bangin hong piang cih ih theih loh a kilawh thei natna hangin zatui leitung nangawn lammang dektakin om hi. Tua natna bawl nading hanciamna tampi ki nei hi. Mitampi te zong lungkia in om thei hi. Tua ahih manin hehnepna hong kisam hi. Nang ii natna sangin Pasian itna lian zaw hi. Pasian in note ading in hehnepna hong pia pa ahi hi,” ci-in Pope in thapiakna nei hi.

Add new comment

1 + 0 =