Kalay Diocese uk Bishop makaih na tawh Kawlgam aa ding thungetna neikhawm

(7.2.2021) at Mainuai, Mary Queen of Peace Centre

***********

Bishop, Priests and Religious in the Diocese of Kalay Stand with the People in Myanmar. 

Kawlgam ah Ki Ukna man tawh hong uk ding Mipi te ii deihna tawh a ki teel Makai te in hong makaih theih nangin RCM Pawlpi in nakpi takin hanciam in thungetna leh thu le la tawh a hih theih bangin panpih mah mah hi.  Kawlgambup Siadaw kipawlna pan in zong mipi te nek leh dawn tawh huh zawh nangin zong thu kikupna nei uh hi.  Mipi te leh Pasian nasem te' ih deih, ih lungngulh a ki bang hi mah ta leh gamtatna tawh ih lah khiat zia te ki bang kimlo hi.  Bang bang hi ta leh ih din mun ciat pan ih hih theih zah ciat in lungkia lo in mapang khawmin sep khiat ding kisam hi.  Thungetna, Lungphona cih te thupi mah mah hi na pin tua te khempeuh sangin Kumpi nasem te ii Civil Disobedience ci-in Zum kah lo in a om uh pen thupi pen dingin lam en ing.  Ih Pasian in eite a tawn tungin hong ompih den a hih manin ih maban ciat pan lung kituak takin hanciam ni.  Annek tui dawn ding lungkham omlo hi a hong piakhia ding mihau, citpitna a neinuam mi tampi tak Pasian in hongpia ding hi.  A diak diak in Kumpi nasemte leh khangno te in lung kituak takin ih gam hoihna ding hanciam paisuak ding tha hongpia nuam ing.  Thuman thutak a zong, amu mite leh a semkhia mite a huh nuam mi tam mah mah hi cih thumanpha hong hawm khia ing.  Launa kihello lungnopna ih Biak Topa Pasian in note khempeuh tungah hongpia ta hen! Amen.

By- Fr.  Joseph Zo Mung (Director of KOSC & RVA Tedim Chin)