Inauguration of St. Alphonses' Church Kanan, Kanmagyi Parish (9.3.2023)

Kanmagyi Parish Priest Rev. Fr. Alphonses Ngul Kho Mang ii makaihna tawh Kanan Khua aa om Falam veng lam ah Falam Pau tawh kikhop theih nading lungngulhna Biakinn thak khat kilam in tua Biakinn pen Kalay Diocese hongcing hong kem Bishop Felix Lian Khen Thang ii thupha piakna tawh Biakinn kong hon pawi March 9 ni-in nuamtak in ki man siang hi.
Zingsang nai 9:00 AM in Vaidawnna nasia tak in a kibawl khitteh, Thangzang khua mi Yangon aa teng Gregory Pa Pau Sian Mang leh Elizabeth Nu Lang Vung te ii huhna tawh a ki lam Tonu Suang hawm thupha piakna leh Biakinn thupha piakna te ki nei in tua khitteh Missa Biakpiakna ki pan hi.
Biakinn pen thuzui mite hanciamna leh mun tuam tuam pan a kipia huhna tawh a kilam hi-in a sum tangin (27955000/-) mmk leh tha tang ( 200) val tawh a kilam hi-in Tonu Suangbuk (Suanghawm) huhna a pia te in zong Biakinn a ding huhna pia beh lai hi cih thu leh Biakinn lam laitakin Pawlpi sungah Falam mi inn (5) bek pha in tu-in Biakinn lam khitteh inn (3) hong lutbeh ahih manin tu-in inn (8) pha ta hi cih thu te inntek Siampi pa Fr. Alphonses in lungdamkohna sungah pulaak khia hi.

Missa Biakpiakna sungah Siadawpa leh Siampi (9) kihel in thuzuimi (500) kim kikhawm thei uh hi. Kikhop manciang sun-an ne in tua khitteh inn lam zuai in nuamtak in ki ciah kik hi.