Inauguration of the Academic Year (2024-2025) at the Assumption Intermediate Seminary, Kalaymyo (21.5.2024)

Rev. Fr. Paulinus Thang Muan Lian (Rector of the Assumption Intermediate Seminary) vaihawm siamna tawh Kalaymyo aa om Siampi Sinna Sang (Assumption Intermediate Seminary) ah (2024-2025) laisin kum Sang honna pawi Missa Biakpiakna May 21, 2024 ni zingsang nai (6:30 am) in Kalay Diocese hongcing hongkem His Excellency Bishop Felix Lian Khen Thang makaihna tawh Missa Biakpiakna nuamtak in kibawl hi.

Siampilian Bishop Felix in sangnaupang te tung ah “kum kipat pan kipan lai hanciam ding, Aung mat bek tawh a lungkimte hilo ding, mat za lakah zakhat mah a ngah sawm te hih ding, hih sangah pen lai bek a kisin hilo in Human Formation, Spiritual Formation, Pastoral Formation leh Intellectual Formation cih bangin nam (4) a kisin ahih manin tua nam (4) teng limtakin na zuihnawh nangun hanciam un” ci-in thapiakna nei hi.
Missa Biakpiakna sungah Siampilian pa leh Siampi (11), St. Joseph Sister, Servite Sister te leh St. Theresa Sister te zong kihel in Missa Biakpiakna man khit ciang a kikhawm teng Assumption Seminary pan zingzan vakna nei uh hi.

Sun hun sungteng Sangnaupangte group tuam tuam in kikhen in Sanghon pawi Bawlung suihna noptak in bawl uh hi.

Hih sangah Formator 1. Fr. Paulinus Thang Muan Lian (Rector), 2. Fr. Ludovic Mathiou (Spiritual Director) leh 3. Fr. Augustine Ha Khui Om (Dean of Students) cih bangin Siampi (3) om in tu kum sangnaupang (31) pha uh hi. Tua (31) lakpan tukum in a lut thak mi (4) pha uh hi. Hih sangah pen hun lui lai-in tan (10) aung teng leh hun thak sung galkap sang leh NUG sang te pan tan (12) a aung teng ama omna Parish Priest in a phal leh ki lut thei hi. Hih Assumption sang ah kum (4) sung laisin khitteh Entrance laihuanna gualzawhna angah te in Puantual ngah in Maymyo Philosophy sangah lut thei ding uh hi.

Sangnaupang te aa ding thu ngetsak ciat ni.