The First Book Launching Ceremony in Kalay Diocese (29.3.2023)

The Homilies Book of His Excellency Bishop Felix Lian Khen Thang was successfully published on March 29, 2023. Thanks be to God.
Kalay Diocese hongcing hongkem Bishop Felix Lian Khen Thang ii Pasian thu tangkona, Kha-an vaknate pen “KHA-AN VAKNA” cih thulu tawh Laibu in kibawl khiazo ahih manin Diocese mintawh “Book Launching Ceremony” ci-in laibu tawh kisai tangkona leh Siadawpa pahtawina pawi March 29, 2023 ni-in kibawl hi. Tua pawi sungah Siadawpa ii Kha-an vakna Laibu leh tukum sungin Diocese Literature Commission pan a kibawl laibute (Meihset) tangko na ki nei hi.
Tua sungah Sia John Vungh Khan Kap in hunuk semin hungeelna mah bangin Fiat Journal Director Rev. Fr. Paul Langh Muan Lian in kipat thungetna makaih hi. Tua khitteh Social Communication and RVA Tedim Chin Service Director Rev. Fr. Joseph Thang Nen Zo Mung in thu konghonna leh (Book Reviewed) bawlna nei hi.
Amah in thukong honna sungah mimal khakkimciat tungah Diocese mintawh (welcome) ci-in muakna aneih khitteh, nidangin laibu ih thoh hang “Book Launching Ceremony” pen Diocese mintawh bawlding kingaihsun kha ngeilo hih mahta leh Siadawpa ih pahtawi nopna leh ih lungdampihna tawh akibawl ahihna leh hih pawi bawlna hangin mailam ah laigelhzia leh laibu bawlna tawh kisai-in ih Diocese sungah khantohna tampi om ding cih lametna tawh a kibawl ahihna thu te gen hi.
Tua banah ama Kha-an vaknate laibu in bawl theihna ding phalna apia Siadawpa tungah lungdamkohna a neih khitteh hih bangin Diocese Literature Commission Zumpi panin a kigelh lai teng khempeuh leh Diocese Fund sum tawh aki thoh/bawl laibu teng khempeuh ih gam khantohna tawh kizui-in (original, copy right) cihte tawh buaina omlo-in, mailam ah hih zum ah asem peuhpeuh in akisap hun hunin abawlkik/thohkik theihna dingin (solf copy) leh (draft) te Diocese Literature Commission zumpi ah limtakin kep cing den ding akisapna thu zong gen hi.
Hih Siadawpa Kha-an vakna laibu tawh kisai-in (Book Reviewed) a bawlna ah hih laibu pen 1) atuamna (Cover) leh laimal te ii amel (colour) hoih, 2) Laidal ciilzatlo-in Cover khitteh apatna leh a tawpna ah a val dal nih tuak koih, 3) A thulute a kilang dingin laimai a lang pan gelh kipan ahih manin apatna leh a tawpnate kician sitset in sim thanop huai, 4) Laidal kim tung leh a thulu te ah laisimte thalawpna dingin amel (color) tuamtuam tawh zem, 5) Adventu hun, Christmas hun, Zehtan hun, Paska hun leh Pawi Lianpite ni-in a gente cih bangin limtakin zatpah theih dingin ki khen sitset ahih manin, a sunga om thu te a thupit banah, apualampan ih et ciangin amel mahmah hoih ahih manin hih laibui ii a hoihna (Quality) in Kawlgam bek thamlo in International Standard nei-in hoih mahmah hi ci-in ama muhna thu genkhiatna nei hi.
Tua khitteh Siadawpa pahtawina in pakpiakna leh Siadawpa tungpan thugenna hun khat ki nei hi. Amah in laigelh/ laibu bawlna ii thupitna leh laisim ding akisapna thute a kipan laisim minamte a khangto ahihna thu te gentehna tuamtuam tawh genin mipite thapiakna nei hi.
Tua banah hih laibu tawh kisai lungdam kohna thu agenna ah “နှုတ်တစ်ရာ စာတလုံး” kammal zakhat leh laimal khat ci-in Kawlten paunak aneih mah bangin ka genkhiat thu te pen huihlakah mangthangsak lo-in mittawh muh theih dingin laibu in hong bawlsak na hih manun ka lungdam mahmah hi. A diakdiakin Computer tawh a hong gelhsak leh soft copy te limtakin ahong kepcing sak Siampite leh Diocese Literature Commission te akipan laibu hoih mahmah in ahong bawlsak Sia John the Baptist Kap Thawn Mung tung leh hih pawi a hong kihel mimal khat kim ciat tungah nakpitakin lungdam ing ci-in lungdamkohna nei hi.
Tua khitteh Head of Diocese Literature Commission Rev. Fr. Peter Thawng Mung tangin Sia Bernard Thawng Sian Lian in tukum sungin Diocese pan akibawl/thoh laibute tawh kisai-in nasepzia leh angimna te uh genkhiatna leh Sia John the Baptist Kap Thawn Mung tung pan Siadawpa ii Kha-an vakna laibu in abawlna tawh kisai-in ama i nasep zia leh ngimnate pulaakna nei hi. Tua khitteh tawmvei moh leh niangtui nekna hun awng ki nei hi.
Tua khitteh hih pawi ah a kihel mimal khat kimciat tungpan ahi zongin a diakdiakin laibu athoh/bawl ngei Siampite leh thuzuite tung pan amaute ii a muhkhak uh ngaihsut hoihte leh Zolai gelhzia laimal zatdan khat le khat (Consistency) kibangkim zo nailo hi mahtaleh ken hi ci bangin zang leng hoihsa ing ci-in amaute muhna ciat uh kikupkhopna hun zong nuamtakin ki nei hi.
Tuakhitteh Diocesan Chancellor Rev. Fr. Maximian Pau Sian Mung makaihna tawh tawpkhak thungetna leh Siadawpa thupha piakna tawh amasa pen Diocese mintawh akibawl “Book Launching Ceremony” nuamtakin ki mansiang hi. Sun-an nekhun sungtengin hongpai mikhempeuhin a thangahna te uh kikum in mailamah zong laibu bawl sialsialin “Book Launching Ceremony” bawlding alungngulhna thute uh pulaak khia hi.
By Fr. Joseph Zo Mung