Diocese Sung Commission tuamtuamah Zum Nasemte Pasianthu Lungngaih Khopna (27.5.2022)

Kalay Diocese sunga om Commission tuamtuam pan in Zum nasemte a omthei teng group Photo

Kalay Diocese sunga om Commission tuamtuam pan in Zum nasemte kipawl khawmin Pasian thu lungngaihna pen a ki bawl loh zawh kum (3/4) bang phata a hih manin Rev. Fr. Andrew Go Khan Nang (Director of KMSS) in ei Commission ciat ah ih bawl sangin kipawl khawmin bawl leng hoih zaw dinghi cih ngaihsutna tawh May 21, 2022 ni-in Commission Makai teng hongsamin thu kikupkhopna khat ki nei hi. Tua sungah Rev. Fr, Raphael Suang Cin Khup (Procurator and in charge of all employees in Diocesan Pastoral Centre), Rev. Fr. Andrew Go Khan Nang (KMSS Director), Rev. Fr. Joseph Thang Nen Zo Mung (Director of Social Communication & RVA Tedim Chin Service), Rev. Fr. Paul Langh Muan Lian (Director of Fiat Journal) leh Rev. Fr. Joseph Pau Lian Kham (Director of Youth & Health Commission) te kihelin a mautengin Zum nasemteng kipawl khawmin Pasian thu lungngaihna Kha Simin a nunung ninga (Friday)ni ta in bawl ding khensatna nei uh hi.

Hih meeting khensatna tawh kizau-in Pasianthu lungngaihna pen May 29, 2022 ni-in ki pan hi. Tua sungah hungelna tawh kizui-in zingsang thungetna man khitteh Rev. Fr. Joseph Zo Mung in Pasian Kammal tawh kha-an vakna hong nei hi. Tua sungah “Ih Nuntakna Sungah Upna Picing ih neih theih nading Abraham leh Tonu Maria te ii nuntakna tawh gentehna hongpia in amautemah bangin ih upna te gamtatna tawh lahkhiat zawh nang lam honglak hi. Tua khitteh Lai Siangtho bulphuhin thumaan thutak ih kantel theihna dingin (Subjective truth leh Objective truth) ci-in eite mitmuh na tawh man ihsak thu leh a omsa amah leh a mahin thumanthutak omkhin ahihna thu gentehna zangin hilhcianna nei hi. Tua bannah hun man ding a thupitna leh (Office Hours) Zum hun sung pen zahtakin vaidang tawh khek loh na ding leh sepding vaipuakte hanciamtak leh lawptakin sepkim ciatnangin zong thapiakna nei hi.

Pasian Kammal tawh Kha-an vakna hun a man khit cingin (Personal Reflection) Pasian thu lungngaihna, Mawhsutna leh Khikhin khopna te ki nei-in atawpna ah Missa Biakpiakna tawh hun ki mansiang sak hi. Missa Biakpiakna pen Rev. Fr. Raphael Khuppi (Procurator) in hong makaih in Laisiangtho tawh kha-an vakna ahong neihna sungah Nasepna ii manphatna leh Zum nasemte ii thupitna pen “ih Diocese pen meileng khat bangin ngaihsunleng ei Zum nasemteng pen Meileng a pai theih nading leh a pai nopna mun atun na dingin mun tuam tuam tek panin na asem meileng a paisak (engine) set tawh a kibang ihhi hi” ci-in gentehna tawh hong gen hi. Tua banah thu kikupkhopna leh kipawlkhawmin nasepna te ii thupitna te zong hong gen hi. A tawpna ah USA gam sunga om Siadawte kipawlna pan Tuucing nasepna tawh kisai-in a hawmkhiat uh lai bulphuhin nasepna ii manphatna leh thupitna pen “Nasepna ii cih pen nek le dawn kicingin ihngah nangin sepkhiatna ciang bekin ngaihsut ding hilo hi. Banghanghiam cih leh na ih sep ciangin Pasian ii a piansak nate a kizom paisuakin anuntak kim theih nadingin a semkhia ih hih manin Pasian ii nasep ahi, Piansak nasep a sepna sungah eitezong a kihel ih hi” ci-in Pasian ii dinmun pan ama sepdingte a semkhia ih hihna zong hong phawk sak hi.

Missa Biakpiakna a man khit ciangin Diocese pan hongpiak sun-an nekkhopna nuamtakin ki nei hi. Sun-an nek kawmin hih Pasian thu lungngaihna sungah a kihel zum nasemte in a thangahna ciat uh kikum khawmin tua sungah Thuhilhsia Bernard Thawn Sian Lian in “Hi bangin Pasianthu lungngaihna ih neih khop ciangin kha thu lam bek hi lo-in, leitung thu te ah zong ki meltheihna, ki thutuahnate khang semsem in ih nasepna te zong picing semsem dingin lamen ka hih manin thupi ka samah mah hi” ci-in a thangahna thu gen khia hi. Rev. Fr. Raphael Khuppi in “Fund sum ih neihna tawh kizui-in mailam ah hih ih Diocese Pastoral Centre bekah hi lo-in mundang Parish tuam tuam te ah zong ih bawl zawh nang hanciam ni” ci-in thapiakna hong nei-in tha kingah mah mah hi.

Hih Pasian thu lungngaihna sungah (KMSS) pan zong pawlkhat khualzin ahih manin hong kihel kim zolo hi. Tua banah ih gamsung buaina hang tawh (Education Commission leh Helth Commission) te in zum hongzo nailo uh ahih manin amaute zong hong kihel thei lo uh ahih manin Siampi (4), Nungak Siangtho (5) leh zum nasemteng a kigawm vekpi mi (40) bek kihel thei hi. Mailam ah ih zopsuak zawh nang thungetna tawh mapang khawm ciat ni.

By- Fr. Joseph Zo Mung

Add new comment

2 + 10 =