Confirmation at St.Theresa Church, Tahan ( Nov 4.2023)

Tahan Parish Priest Rev. Fr. Joseph Kap Tung Nung (VF) vaihawm siam na tawh Kalay Diocese hongcing hongkem His Excellency Bishop Felix Lian Khen Thang in Tahan St. Theresa Biakinn pi sungah tuni (4.11.2023) ni-in Christma Hanthotna piakna nei hi.
Tua sungah naupang (90) in Christma Hanthotna sanguh hi.
Siadawpa in Nu le Pa te in tate Pasian thu tawh a pattah ding a thutpitna leh bangci bangin pattah ding cih thu gen hi.
Tua khitteh Rev. Fr. Joseph Zo Mung (Director of KOSC & RVA) in hilhcianna a piakna sungah Christma Hanthohna piakna pen Khasiangtho piakna, Khasiangtho sanna hi-in zat dingin a hong kipia ahi hi.
Tua ahih manin Christma Hanthohna a sangsa te in upnate mite lakah tetti pan ngam ding, thupha bawlna neih ding leh Thu man thutang zui-in gamtat hoih in gamta ding cih thu te gen hi.
Tua khitteh inntek Siampi pa Rev. Fr. Joseph Kap San (VF) in Pahtawina Lai piakna a neih khitteh hi bangin pahtawina lai kong piak ciangin Pasian thu thei khin ta hi sinbeh kulnawnlo hi ci-in ciaptehna tawh a hong kipia hi lo hi.
Pasian thu theihna pen ki cing cih omlo in ih tek dongin sin ding a kisam ahi hi. Hih pahtawina kongpiak na pen hih laidal na muh sialsial un Christma Hanthotna asang khin sa hing ci-in na ki phawk den na ding uh leh nasan ni te uh leh kua Siadaw in bang hongpia cih te baih tak in theih na ding leh tu aa a sang khawm teng ki thei in 2023 kum aa Christma Hanthotna a sang tengin ki pawlin na sem ni cih bangin na hoih na sepkhop theih na dingun letmat certificate a hongpia ka hi hi ci-in ama ngimna teng gen khia hi.
Tu ni pen kikhopna ah mipi (400) kim pha dingin ki ummawh hi.