Bishop Felix Tawh Kimuh Khop Na

Phai, Siangtho Lungtang Parish huam sunga om Siampi pa Rev. Fr. Damian Zam Sian Dal, Pawlpi lam pan Panmun nei Upa, Nupi, leh Khangno teng in Topa Jesu thu a kisawp na Pawi bawl ni (10.1.2021) ni-in Kalay Diocese hongcing hong kem Siampi Liang Bishop Felix tawh ki muh khopna nei in tha ki ngah mah mah hi.

Tua sungah Fr. Damian Dal in tu laitak in Phai Parish sungah thuzui mi inn (285) pha in mi vekpi (1553) pha hi cih thu hong pu laak hi.

(2020) kum, kum khat sungin tuisawpna a ngah thak U Lian mi (11) leh naupang (50), Kitenna Sacramentu a sang Nupa kop (12) leh a sawt lo in a sang ding Pasian thu a sin sa kop (4) om in kum khat sungin a si mi (8) pha hi cih thute leh Parish sunga nasep zia, Pan mun kipiak zia te leh Panmun nei teng Siadawpa tungah pulaak na hong nei in Panmun len te ii a hanciam zia te uh zong hong pulak khia in tha kingah mah mah hi.

Tua khitteh Sia te Makai te leh Upa te in amau sepna tuam tuam te hong pulaak khia in tua sung pan a diak diak in Biakinn pi tu a ciang a lam zawh na hangin Ih Biak Topa Pasian tung, Siadawpa tung, a makaih Fr. Damian Dal tung leh huhna a pia mite khempeuh tungah a lungdam na thute uh hong gen khia uh hi.

Tua sungah a thangah huai pha diak leh thuzui mite hanciam na a etteh huai mahmah khat in Biakinn pi lam zawh nang lungngulhna tawh (2015) kum pek pan kipan Rev. Fr. Wilfred Do Suan makaih na tawh kha khat in khat vei ta NOVENA a bawl uh pen tuni dongin pelh lo-in kha sim in bawl zo uh hi cih thu leh March 23, 2020 kum in a sum neih vekpi uh teng (400) tawh a ki pan khia hi-in tu-in hi bang ciangin a ki zawh theih pen Pasian thupha taktak hi ci-in khitui lung liang in Upate in a lungdam na te uh gen khia hi. Phai Parish sungah thuzui mite zawng thei mahmah hi ta leh Mun tuamtuam pan huhna kipia ahih manin lamet ngamloh tuni ciang dong sum tang in teng (1889) kizang khin in a lang sangin a tam zaw ki zo khin a hih na thu leh tha tang tawh mipi sep theih ding peuh mah Pawlpi tha tawh kisem in tua bangin mipi te kipumkhat in a hanciam na uh hangin hi ciang kizo khin a hih na thu leh mun dang pan in huhna ngah ding upna leh lametna tawh tu kum November kha sungin Biakinn hon Pawi bawl zawh nang hanciam ding cih thu te zong hong pulaak uh hi.

Tua khit teh Siadawpa in amaute ii hanciam na te tungah Pahtakna thu manpha tampi a gen khitteh "Midikte, Lungsim hoih mite, a kithutuak mite leh a hanciam, a citak mite tungah sumkhuk om hi" ci-in thapiak na leh mailam ah a hanciam semsem nangun vaikhak na nei hi.

Tua khitteh Siadawpa a zui Siampi te in zong amau te ii Parish sunga panmun kipiak zia, sum zon zia leh sum zatna te kician takin a pulaak na te uh a muh nate uh leh Parish sung nasepna te a kigen khiatna te tung tawnin a thangah na te uh a gen kawm un mailam ah kipumkhat in a sep ahanciam nangun thapiakna nei uh hi. Hun man ciangin Biakinn thak nuai teng Sun an nekna in kizang thei pah ahih manin lem mah mah hi. Biakinn lam na ding huhna a pia zo te leh a pia kha te pen mi hampha hi, Pasian in mikim tungah Biakinn lam khuan pialo hi. Biakinn a lamkha te, huhna a piate pen aham pha mahmah hi cih thumanpha te an-nek kawmkawm in Siadawpa in hong gen khia in, anthuk te leh an huan te-in zong zaknop sa in anthuk ding bang phawklo dektak liang uh hi.