A (8) Veina Sacred Heart Parish Khangno Thusin Na (May 17-22, 2023)

Phai, Siangtho lungtang Parish acing akem Rev. Fr. Damian Zam Sian Dal (PP) ii vaihawm siamna tawh a (8) veina Sacred Heart Parish Khangno Thusinna pen May 17-22 dong nili sung Laibung khuathak or Khaikam no (4) ah nasia takin kibawl hi.

Hih Pasian thusinna ah Khangno vekpi (150) kim ki helin Siampi (4) leh Deacon (1) ni thuhilhna nei uh hi.
Tua sungah Rev. Fr. Joseph Thang Nen Zo Mung (Director of Social Communication & RVA) in Social Media zat dan leh tu laitak in Online pan Catholic Upna a tello te ii thugenkhialh te uh tawh kisai hilhcian na nei hi.

Rev. Fr. Paul Pau Kim Tuang (In charge of Mainuai Spiritual & Training Centre) in “Khangno leh thungetna” cih thulu tawh hilhcianna nei hi.

Rev. Fr. Joseph Pau Lian Kham (Director of Youth & Health Commissions) in “Khangnote Pasian thu leh Leitung thu ah Bangcibangin Khangto khawm Ding” cih thulu tawh hilhcian na nei hi.

Rev. Deacon Andrew Thang Muan Tuang in Thuciam Lui pen thuciam thak ah aki cin na leh tua kicinna pen Missa Biakpiakna ahih na thu te limtakin hilhcian na nei hi.

Inteek Siampipa Rev. Fr. Damian Zam Sian Dal in “Pawlpi Suanga Kammal Zatte ii Khiatna leh Nuntakpih Zia” cih thulu tawh hilhcian na nei hi.

Tintan hun pen Thursday ni pan Saturday ni dong ni (3) sung hi-in nipini pen Evaluation ci-in Tintan tawh kisai etkikna te ki nei hi.

Tua sungah khangnote in Tintan hun sungin a thangahna te uh leh mailam ah zong tintan bawl ding a lungngulhna te uh pulak khia hi.

Tua khitteh Tintan apia Siampite in “Phai Parish sunga Khangnote pen a theihnop thu te uh limtakin dong ngam uh ahih manun thupi mah mah hi. Hi bangin adot ngamna uh pen Tintan a bawl pahpah manun a dong ngam hi ding hi” ci-in a thangahna te uh leh Tintan abawl pah pah nu uh ii a phattuamna te genkhiatna nei uh hi.

Hih Khaikam No (4) ah pen thuzuimi inn (30) bek pha ahih manin Mission sep ding tampi kisam lai hi. A mun pen tai (9) tawh zong kigamla lua lo in Luitui tawh kinai ahih manin tui zong nuam takin ki pek thei hi.

Hi munah Biakinn huanggol leh Biakinn hoih neizo leng mailamah Khangnote aa ding Pasian thu sinna leh Picnic pai na dingin zong mun hoih mahmah khat hi thei ding hi.

By Fr. Joseph Zo Mung