A (4) Veina Tuivial Khuabup Pasian Thu Sinna (15-20.2023)

Phai, Hlaingthaya Parish sung Tuivial Khua ah Pasian thusinna ah pen February 15 ni zin kitungin 20 ni ziciah ni (4) sung bit nuamtak in kisin thei hi.
Tua Pasian thu sinna hunsungah
1. Rev. Fr. Damian Zam Sian Dal in (Upna- Biakpiakna, a thupitna leh a kizop zia)
2. Rev. Fr. Joseph Thang Nen Zo Mung in (Sacramentu thu, a diak diak in Mawhsutna) leh 3. Rev. Deacon Andrew Thang Muan Tuang in (Laisiangtho tawh kituak in Nuntak Zia leh a theih huai thu thak tam tuam) te hilh cian na nei hi.
Hih Tuavial khua Pasian thu sinna ah Phai Khangnote, Pimpih khua, Mualzang khua leh Suangdawh (Tamdeng) khua te leh Tuivial khua sung pan Pawlpi tuam tuam pan zong Pasian thu a lungngulh te hong kihel uh hi.
Pasian thu sinna hun sung teng nitak simin lenkhopna leh Pasian thu tangkona nasia kakin ki bawl hi.
Tuivial khua ah inn (113) pha in tua sung pan Pawlpi mi inn (47) pha uh hi.
Hih Pasian thu sinna hun sungin naungek leh U ham Tuisawpna Sacramentu a ngah thak mi (10) pha in, Siangthopumpi a sang cil naupang mi (8) pha hi.
Tua banah Zo ngeina tawh a ki tengsa Nupa kop (6) in Kentenna Sacramentu lungkim takin sangthei uh hi.
Nipini Missa Biakiakna hun sungin U Ham a cidamlote Biakinn ah ki pua in tua munah Sathau Siangtho nuhna leh Siangtho pumpi sanna ki neisak hi.
Biakinn ah puak ding alem nawnlo cina mi (6) pen a maute teenna inn ah Siangtho pumpi puakna leh Sathau Siangtho nuhna ki nei hi. Tua sung ah kum (80) val pitek khat leh kum (90) val putek nupa kop khat kihelin amaute nih pen a limtak in ki hopih thei lai uh hi.
Tuivial khua Tuucing Hoihpa Biakinn (Church of the Good Shepherd) pen luilua ta a hih manin tu-in a khak taih in pi (90 x 50) lam ding kihanciam in Foundation te a sep san laitak uh ahi hi.
A maute ii ki thutuahna leh hanciam na te pen tha ngah huai mah mah hi. Makai pa gen na ah Feb. 22, ni Vua hun lut ma deuh in Khua zangin Pawlpi bup pan Biakinn ah na sep huhin ki kuan dinga, Pawlpi te in vok khat tawh sun-an vak ding ci-in nipini in tangko khia hi.
A maute ii tupna sawmna te a tang tun nangin thu ngetna leh sum leh paai te tawh ma pang khawm ciat ni.