The (32th) Priestly Ordination of His Excellency Bishop Felix Lian Khen Thang, Bishop of Kalay Diocese (23.2.2022)

Tuni Siadawpa ii Siampi suah zawh kum (32) a cin na pawi pen tuni zingsang in Siadawpa makaihna tawh Lungdam kohna Missa Biakpiakna Siadaw huang aa om teng tawh ki bawlin, Nitak ankuang umkhopna pen St. Theresa Nungak Siangtho te tawh ki bawl khawm hi. Minor Sangnaupang te in zong lasak na leh letsong piakna tawh Siadawpa pahtawina nei uh hi.
Khua hun hoih loh kawmkal panin Siadawpa ii Siampi suahzawh kum (32) cin na pawi nuamtak in a hong dawn sak ih Biak Topa Pasian tungah lungdam ih ko hi.
Siadawpa in Missa Biakpiakna hun sungin “kum (32) ih cih pen Siampite leh Nungak Siangtho te pawl khat ii kum tawh kikim ding hi mah ta leh kei aa ding in ka Siampi suah pen zanni mah tawh ki bang lel hi. Thupha bawlna ding hun tom lua hi. A nuntak na hu a hong kawm ih Pa Pasian tungah lungdam ko ni, ih nuntakna te nosuah sak in Pasian na ih sepna te ah hanciam ni” ci-in thapiak na hong nei hi.
Ih Siadawpa in cidam lungnuam takin a tuuno te hong makaih zawh den nang thu ngetsak ciat ni.