A (3) Veina Kalay Diocese Centre aa om Zum Nasemte Pasian thu Lungngaihna (29.7.2022)

A (3) Veina Kalay Diocese Centre aa om Zum Nasemte Pasianthu Lungngaihna

Tuni Pasian thu lungngaihna pen a ngeina mah bangin Zingsang thungetna nai (9:00 AM) in ki pan in tua khitteh Rev. Fr. Paul Langh Muan Lian (Director of Fiat Journal) in Pasianthu Lungngaihna hong makaih hi.

 

Amah in (Rom 12:15) na sunga "A lungdamte tawh lungdam khawm unla, a kapte tawh kap khawmun" cih Pasian Kammal bulphuhin hazatna lungsim neihna ii a hoihlohna thu te leh anuam te tawh nuam khawmin, a dahte tawh dah khop ding a kisapna thu hong gen khia hi. 

 

Amah in Kawlte paunak sungah "hazatna in mihingte nuntakna hong suksiat sak banah aguh nangawn hong muatsak zo hi" a cih mah bangin hazatna lungsim ih neih nak leh nopsakna tawh a kigamla ih hihna thu hong gen hi. 

 

Tua banah hazatna lungsim pen ih sep ih bawlna te ah ih ngaihsut bangin gualzawhna ih ngah loh hunciang leh ih upmawhloh pi-in ih neu-et mite in gualzawhna a ngah hun  ciangin ki nei thei phadaik hi cih thu zong gentehna tuamtuam tawh hong gen in zaknop mah mah hi.

Hazatna ih cih pen ei leh ei ih manphatna ih ki telloh hunciangin ki nei thei pahdiak hi cih zong Laisiangtho (Piancil 4:1-8) na bulphuhin Cain in a sanggampa Abel haza in a thatna thu leh (1Samuel 18:17-27) na bulphuhin Saul in amah tungah mawhna abawl hetlo David pen a hazat manin a thah sawmna thu te gentehna tawh hong gen in hazatna hangin bangzahta in siatna leitungah hong piangkhia hiam cih thu te hong gen hi.

 

Tua khitteh hazatna ih cih pen eite khat ciat in zong ki nei thei a hih manin, Ken Kua tungah Hazatna nei ka hi hiam, Hazatna kaneihna hangin bang siatna piangsak ka hi hiam cih ei leh ei ki ngaih sun in Hazatna lungsim ih neih khak leh kikhelin midangte tungah itna lungsim hoih tawh nasem ni tua hi leh leitung vantungah nopsakna ih ngah ding hi ci-in Pasian thu lungngaihna hong makaih hi.

 

Tua khitteh nailang sung (Personal Reflection) daitakin Pasian thu lungngaihna, ih mawhna ih khialhna, ih lungsim ngaihsutna leh ih gamtatkhialh nate ei leh ei ki sittel na ki nei photin tua khitteh  Siampite kiangah Mawhsutna te ki nei hi.

 

Mawhsutna hun teng man khit ciangin Sr. Francisca Cingbawi (CYCK) makaihna tawh khi (50) khinna ki nei hi. Hih khikhinna hun sungin Kawlgam sungah ki Ukna man Federal Democracy amanlang in ngah theihnang leh acimawh, bawlsiatna athuak, thungetsak ding a lung-gulh mite khempeuh tungah a kisam thupha te Tonu Maria beelin Topa Pasian tungah ngetna ki nei hi.

 

Khikhinna a man khit (11:00 AM) ciangin Missa Biakpiakna  ki bawl hi. Missa Biakpiakna hunsungin Fr. Paul mahin Kha-an vakna nei-in tua sungah tuni aa a kisim lungdamna Laisiangtho bulphuhin Upna a nei mite tung bek ah Topa Jesu in nalamdang lak ahih manin Pasian thupha ih ngah na dingin upna picing ih neih ding a kisapna thu te leh Tuni Misiangtho Martha ii Pawi ni a hih manin Misiangtho Martha bangin Zindo siam ding a kisapna thu te hong gen hi. 

 

Missa Biakpiakna a man khit ciangin Rev. Fr. Andrew Go Khan Nang (Director of KMSS) in thu zaksakna pawlkhat hong nei-in (12:00 Noon) hun ciangin KMSS leh Diocese pan kipawlin a hong piak khiatuh sun-an nekna tawh nuamtakin hun te ki mansiang hi.

 

Hih Pasian thu lungngaihna sungah Siampi (4), Nungak Siangtho, thuhilhsia te leh Zum nasem teng a kigawm vekpi mimal (40) val kipha hi. Hih Pasian thu lungngaihna pen Kha sim in a nunung ni nga (Friday) ni ta in a ki bawl a hi hi.

Add new comment

19 + 0 =