A (14) Veina Tuithang Parish Khangno Pawi, St. Mary’s Church, Tungzang Khua (20-24, 4.2023)

Rev. Fr. Matthew Tong Za Ngam makaihna tawh a (14) veina Tuithang Parish sung Khangnote Pasian thusinna leh Khangno pawi pen St. Mary Biakinn, Tungzang khua ah April 20 -24 dong nasia takin kibawl hi.

Tuithang Parish sungah khua (12) om in tua sung pan khangno mi (300) Pasian thusin in Tungzang khua ah pai uh hi. Tintan a pia teng leh a piak uh thulu teng pen 1) Rev. Fr. Damian Zam Sian Dal (Laisiangtho leh Biakpiakna thu) 2) Rev. Fr. Cyril Dong Suan Pau (Doctrine and Dogma of the Church) 3) Catechist Joseph Cin Tul Kim (Kitenna Sacramentu leh Innkuan thu) 4) Zato lam pan Sia Khai (H.A) in Naupaai pan nau suah khit dong kikep zua ding leh 6) Sitni Kamno (Lawyer) in Gamsung vai tawh kisai zuih ding thukhun te leh a theih huai tuam tuam thu te cih bangin hilhcian na nei uh hi.

Sun hun tengin thu sinna nei-in nitak hunin lenkhopna, Pasian thu tangkona leh kidemna tuamtuam te bawl uh hi. Thu sinin a pai khangnote bek thamlo in nitak simin pawi simin a pai khua sung pan nu le pa, u le nau a kua matek in thangah thei mahmah uh hi.

Hih Tintan hun sungah Siampi (3), Deacon (1), Nungak Siangtho (1), Thuhilhsia (10) kihelin Pawipi ni pen khua sung pan leh khua veng pan a pai teng tawh Missa Biakpiakna sungah mi (450) bang ki pha hi cih thu te Tuithang Parish Khangno Makai John Lianbawi genna tung tawnin hong hawm sawn ing.

Ih gamsung buaina te thanemna in ngaihsun lo in, ih khantohna ding akipatna hi cih phawkin ih sin sa, ih theihsa Pasian thu nungta te Pasian deihna tawh kituak in, ih zatkhiat zawh nangin hanciam ciat ni. Ih khangno lai, ih tha hat lai-in ih hun neih sunsun te Pasian aa ding leh gam le lei aa dingin ih zat theih nangin hanciam ciat ni.

Ih khangno hun a zang siamte ih hih zawh nang ih Biak Topa Pasian in ei mimal khat kim ciat tungah thupha hongpia ta hen! Amen.

By Fr. Joseph Zo Mung