*Tonu Maria Vantungah akilaktohna pawi*

The Assumption of the Blessed Virgin Mary

“Vantung ah a lamdang lim lian khat hong kilang hi: numei khat in ni silhin, a khe ah khapi om a, a lutung ah aksi sawmlenih a tuang kumpi lukhu a khu hi.” (Rev 12 : 1)

Tonu Maria Vantung ah Pumpi le kha a kilaktohna pawi pen nungzuipite hun pankipan tanglai pawlpi sungah na kipan hi.

Tonu ii leitung nuntakna hun nunung a tun ciangin nungzuipite in amau tun na ciat pan Tonu Maria zahtakna apia dingin hong ciah kik uh aa, ahi zongin nungzuipi Thomas ahih leh a gamla pen mun (India gam) atun laitak ahih manin hong tung zo lo hi. Nungzuipi Thomas a tun ciangin Tonu ii luang hawm zahtakna apia dingin Tonu a kivuina han ah apai leh tua han ah anamtui mahmah paak te bek na om hi. Jew te' ngeina hi leh si luangte pen anamtui te tawh kinuih zel hi. Paak koih cih bang om ngei lo hi. Ahi zongin Tonu Maria luang om nawn lo in paak vive tawh a kidimna in alamdang mahmah thu hi a, “misite hin kikna” cih nungzuipite upna ii nambat 11 na kicing sak hi. Tua pankipan Topa Jesu nungzuipite in “Tonu Maria ii pumpi leh kha in Vantungah ki lato hi” cih upna thu hong hilh uh hi.

Nidanglai Pawlpi sungah hih pawi pen mun tampi ah na kibawl hi. Kumzalom 5 ciangin “Tonu Maria in pumpi leh kha kigawmin vantung ah ki lato hi” cih upna thu pen a ki tangko nailoh hangin pawlpi in umin na teel khin hi.

1950 kum, November 1 ni-in Pope Pius XII na in Tonu Maria vantung ah a kilaktohna pawi pen pawlpi’ upna in na tangko hi. Pope pa tangko na ah “Ei te’ Topa Jesu, nungzuipi Petru leh Paul te ii thu neihna tawh a genna in Pasian nu ahi, a siangtho Tonu Maria in leitungah ama nuntak hun a bei ciangin pumpi leh kha kigawmin vantungah ki lato hi” cih thu ahi hi.

Bang hangin hi zah a athupi pahtawina Pasian in Tonu Maria pia hiam? Tonu Maria ii nungak siangtho hih den na, a siangtho na, a kipiak khiatna te bek hi lo-in, Nu Pawlpi ii tangthu sung ah sim le hang, tu ni ciang dong Misiangtho te ii luang hawm te kisia lo in a ih mu bangin a om na thu te ih mu thei hi. Pasian in ama Misiangtho te pen nuntakna anei khempeuh leh ei te mai ah alamdang takin kisia lo in pahtawina pia a, ei te thu hong hilh Pasian in mawhna anei lo nungak siangtho, ama Nu pen kisia sak lo in pumpi leh kha kigawmin vantungah a laktohna in khiatna nei pha mahmah hi. Zong ahi ding mah hi. Topa Jesu in ama thu hilhna sung pan a lian pen upna teci hong lahna zong ahi hi. Topa Jesu in sihna zo in hong thawhkik khit ciangin a nungzuipi te kiangah na kilak den a, vantung gam ah ama vangliatna tawh akah to Topa in ama nungzuite sung pan khat ahi, Tonu Maria pen ih etteh dingin amah bang mah in amah tawh vantung gam ah pumpi leh kha kigawmin tawntung nopsakna apia ahi hi.

“Bang hang hiam cih leh Jesu a sih khit ciangin thokik hi, ci-in i up mah bangin, Pasian in Jesu’ sungah a si mite zong amah tawh a tonpih ding hi.” (1 Thess 4 : 14)

Lai Siangtho sungah zong pumpi leh kha kigawmin vantung ah a kilato mi pawl khat aom lam ih mu thei hi. (Pian 5 : 24, Heb 11 : 5, 2 king 2 : 1-13, 1 Cor 15 : 23) te ah ki mu thei hi.

1917, May 13 ni pankipan Portugal gam, Fatima khua ah Tonu Maria a kilahna pan a vaikhakna sungah khi khinna tawh leitung galpi te dal na ding te kihel aa, tua mah bangin khi khin in thu ngetna tawh Russia communist leh lei tung galpi nihna te ki zo hi. Russia communist zawh ni pen 1991 kum, December 8 ni hi aa, anihna ahi leitung galpi nihna zawh hun pen 1945 kum, Aug 15 ni hi. Tonu in ama pawi pi nite ah ama lungtang tungah ap-in thu ngetna te k icing sak hi cih hong lak hi.

“Tu-a kipan a khang a khang in kei thupha ngahnu hong ci taktak ding uh hi” (Lk 1 : 48)

Add new comment

2 + 6 =