Tonu Maria Suahni. (September 8)

Tonu ading suahni letsong nam (5)
***********
1. Asiangtho lungtang
------------
Mawhcilna neilo a piang Tonu Maria in amah a it te zong mawhna gu tawh kipelh sak nuam hi.
Tua ahih manin Tonu suahni letsong dingin hoihtakin kisik kikna tak tawh mawhsut ve.
Misiangtho Pope John Paul II in a gen na ah-
“Tonu tualpite in Kha cidam nadingin hong bawl zato munte hi. Bang hang hiam cih leh hoih takin mawhsutna hangin mawhnei mite kha a siansuah, ih belhna vantung innpi ahih man hi” ci hi.

2. Tonu thu te ngaihsunin ama min sapna
------------
Tonu tungah zahtakna anei phadiak ahi, Tonu ii Oblates kipawlna aphuan pa Venerable Fr. Pio Bruno Lanteri ii zuih den thu khatin “Tonu thute ngaihsun in ama min lawhna” ahi hi.
A nu tawh lam apaikhawm naupangno in a Nu thu ngaihsunin a nu sam den ding hi.
Tua ahih manin Tonu a it te in ama thu ngaihsun denin ama min pen lungtang sung pan leh kam pan sap zel, lawh zelna tawh suahni letsong pia in.

3. Tonu ii nuntakzia te ettehna
-----------
Tonu tungah aman zahtakna’ cih laibu a gelh ahi, St. Louis de Montfort in Tonu ii athupi pen nuntak zia nam (10) hong lak hi.
Tua te in-
1. Lungnemna
2. Apicing it na
3. Thumangna
4. Lungsim tawh thunget tawntungna
5. Siangthona
6. Pilna, ciimna
7. Lungduaina
8. Upna
9. Kiniamkhiatna leh
10. Kidekna te ahi hi.
Tonu a it takpi mite in ama ii nuntakzia te ettehin nuntakna tawh ahoih mahmah suahni letsongte Tonu pia ni.

4. Tonu thu te simna
----------------
Tonu thu te a kigelh laibute simna in zong Tonu tungah suahni letsong piakna mah ahi hi.
St. Alphonsus Marie Liguori gelh ahi, ‘Tonu ii vangliatna te (Glories of Mary) leh a dang Tonu thu a kigelh laibu tampi om hi.

5. Khi khinna
--------------
Leitung ah kilemna aom na ding leh na innkuan sungah hotkhiatna nangah nadingin cih ngimna tawh Khi khin na dingin Tonu in Fatima ah akilah lai-in gen hi.
Leitungin ki lem lohna leh gal ki do nate lam ah mainawt in om hi. Goliath leh David te thu sunga, David bangin ‘Pasian’ hih zawhloh bang mah om lo’ cih upna kip tawh kalsuan peuh leng siatnate khempeuh ki zo ding hi.
Tonu suahni ah Tonu in a it mahmah ahi, Khi thungetna ngenin. Hih letsongin Tonu ii lungtang sungah lungnopna tawh kidim sakin na galte khempeuh zong hong zo sak ding hi.
Hehpihna tawh a kidim Nu aw…Kote adingin thu hong ngetsak in.
Kilemna Kumpinu aw…Kote adingin thu hong ngetsak in.