THAWHKIKNA THU

B.C. 180-161 hun lai pek a kipanin Judah mite in Thawhkikna om ding hi, cih upna nei khin ahihna Maccabees nihna sungah i mu hi. Judah Maccabee mahmah in a sih ma deuhin a gen inah, "Pasian in kote hong hingkiksak ding hi, cih lamen ka hih manun mihingte' khutlum tawh sih ding a teel ka hi uh hi. Ahi zongin note aadingin ahih leh tawntung nuntakna a ngah dingin thawhkikna omlo ding hi," ci hi (2 Maccabees 7:14). Tua ahih manin Martha in Topa Jesu kiangah, "Ni tawp ni a, thawhkik hun ah amah hong thawhkik ding ka thei hi," a ci ahi hi (Jn 11:24).

Ahi zongin Sadducee-te in thawhkikna omlo hi, ci-in um uh hi (Mt 22:23). Pharisee-te in thawhkikna om hi, ci-in a up uh hangin bangci bangin hong piang dinga, kua hangin piang ding, cih pen acian atai-in a gen siang thei kuamah omlo hi. Martha in zong a sanggampa Lazarus pen ni tawp ni ciang thokik ding, cih upna a neih hangin kua hanga thokik ding, cih thei tuan lo hi. Thawhkikna a piangsak dingpa pen Topa Jesu ahih lam thei kha lo uh hi. Tua ahih manin Topa Jesu in, "Keimah in thawhkikna le nuntakna ka hi hi, kei hong um mi a si zongin a nungta kik ding hi (Jn 11:26). Topa Jesu in a thawhkiksak mi thumte a thawhkiksak masiah sihna pan a thokik kuamah om nai lo hi. Topa Jesu in midangte bek a thosak thei hi loin amah mah a sih zawh ni thum ni ciangin sihna pan hong thokik hi.

A zenzenin Topa Jesu in mihing suahna hong la lo hi peuhmah leh "Pasian si" cih bang om thei lo ahih manin si thei lo ding hi. Topa Jesu si thei kei leh thawhkikna zong hong pia theilo pah ding hi. Tua hi a, a si thei lo Topa Jesu in a sih theihna dingin mihing suahna hong lak manin a si thei lo Pasian in a si thei Pasian hong suak a, Ama sihna hangin a si thci lcitung mite in a si thei lo kha nuntakna a ngah ihi hi.

Topa Jesu in thawhkikna le nuntakna ahih mah bangin a sisa Lazarus (Jn 11:1-14), Naim khua meigongnu' tapa tangval (Lk 7:11), le Jairus' tanu kum sawm le kum nih a pha numeino (Mt 9: 25) te sihna pan thokiksak hi. Adam le Eva' mawhna hanga i mansuah nuntakna pen hong piakik ahi hi. Tua ahih manin Late Lai Siangtho sungah, "Hih Ni pen TOPA' bawlsa Ni hi a, eite lungdamin i kipak hi," na ci hi (Late 118:24).

TANGTHU

Nidang lai-in ei Zogam khua khatah "Khua Thang" min nei mi khat om hi. Amah pen a neu lai-in a pa in nusia baih ahih manin a nu bek tawh hingim takin khangkhia hi. Amah hong tangval ciangin Maymyo (tu-in Pyin Oo Lwin) ah paltan (galkap) hong tum hi. Amah pen a neu tunga kipan gentheih haksakna teng a sinsa, a theisa khat ahih manin kiniamkhiat mahmah a, kampau, luhek, omdan khawldante zong siam mahmah hi. Amah in mi lungpil khat ahih manin tungsiahte' maipha a ngah bek tham lohin kholhpih lawm le gualte' suan le muan pen khatin hong om hi.

          Ni khat a nu in ginneih lohpi-in sikkhau lai (6-j:4:09) khat ngah hi. Tua sikkhau lai sungah, "Daw………..aw, na tapa Khua Thang in tua ni tua kha in gam le lei aadingin a nuntakna pia hi," ci'n kigelh hi. Tua ciangin a nu zong, "Vansan leingial in sial banga to khat ka neih in hong nusia ta," ci-in tamlo duatduatin hong kap ngaungau hi. A veng a pam a u a nau in hong delh pah ngeingai uh a, Khua Tuang' luang dingin nahtang luang a bawl khit uh teh puan silhsakin a gei a pam pan tutpihin kap ngeingai uh hi. Pasalte in minsial kawmkawmin than lawndamdam uh hi.

Khua Thang a sih zawh ni sagih a cin ciangin vui bawl dingin a luang pusuah uh a, inntual ah lap hong kipan ta uh hi. Ngawk e ngawk ....sa ngawk e ngawk e..., ci-in a lap ziahziah laitakun, khuamual pan in mi khat in, "A lian e, a thang e...ka nu aw na dawn aw, ka pa aw na dawn aw…., ci-in han lasa a awng taitai khat za uh hi. Kua a hiam cih a en dingin mi khat a paisak uh leh Khua Thang na hi hi. Khua Thang in Bu puan, Bu lukhu khu-in hong ciahsuk luanluan mu hi. Tua ciangin  a sawlpa uh hong kilehkik a, siluang laam ziahziah a omte kiangah, "Khua Thang hi ei, Khua Thang hong ciah ei," ci-in naklah

liangin hong gen hi. Sivui dingte in zong um buang umlo buang khat tawh kap kawmkawmin Khua Thang dawn dingin hong pai ngeingai uh hi. Khua Thang a muh uh ciangin lamdangsa mahmah uh a, a nu in Khua T'hang' ngawngah luai khat suahin, "Ka mang a hia, ka tak a hia, Thang no aw! Nuam mah singe maw ta zen! Ka ta a sisa a thokikk hi lo na maw! Nuam zen mah sing e!" ci-in lungdamna khitui hong nul leuleu uh hi. A u a naute in a si khin sa a a ngaihsut uh Khua Thang in a sih loh banah Bu za a ngah pen a khuapihte in lungdamin angtanpih mahmah uh a, amah dawna le pahtawina-in pawi nasia takin hong

bawl uh hi.

Khua Thang in a khuapihte tungah, "Sikkhau lai sunga si a cih pen ka min kibatpihpa hi a, a leihsa a khial kha ahi hi," ci-in genkik hi.

Khua Thang a si hilo a, a min kibatpihpa a si ahih hangin a nu le a khuapihte'  ngaihsutna ah Khua Thang a sisa a thokik zahin ngaihsun uh a, a 1ungdamna uh kigen zolo hi.

Topa Jesu ahih leh a min kibatpih pa a si hilo a, amah mah a si ahi hi. A sih zawh ni thum khit teh a thokik ngiat ahih manin Tonu Maria le ei a u a naute aadingin bangzah takin lungdamhuai a hiam! Alleluai, Topa' min thang ta hen, Amen.

Add new comment

8 + 0 =